İki gündür Azərbaycan və Ermənistan mediası Qarabağda özünü buraxmış separatçıların “keçmiş prezidentləri" Arkadi Qukasyan, Bako Saakyan, Arayik Arutyunyan, eləcə də xuntada "parlament sədri" olmuş David İşxanyanın saxlanıldığı barədə məlumat yayır.

Hələ ki, Arayik Arutyunyan istisna olmaqla digərləri haqda məlumatlara Azərbaycanın hüquq-mühafizə orqanları tərəfindən rəsmi reaksiya bildirilməyib. Eyni zamanda informasiya təkzib də edilməyib. Bu isə adları çəkilən şəxslərin saxlanıldığını dolayısı ilə təsdiqləyir.

Əldə edilən informasiyaya görə, bu gün və ya sabah Azərbaycan Respublikasının müvafiq qurumları tərəfindən separatçı “liderlər” barədə rəsmi məlumat yayılacağı gözlənilir.

Xatırladaq ki, indiyədək rəsmi qurumlar qondarma rejimin “keçmiş xarici işlər naziri” David Babayan, "keçmiş dövlət naziri" Ruben Vardanyan, "keçmiş müdafiə naziri" Lyova Henrixi Mnatsakanyan, separatçıların “Müdafiə Ordusu komandanının birinci müavini" Davit Manukyanın saxlanıldığı barədə məlumat yayıblar.

Qeyd edək ki, sentyabrın 19-20-də Ordumuzun keçirdiyi lokal antiterror tədbirlərindən sonra separatçı rejim ağ bayraq qaldıraraq özünü buraxmağa məcbur edilib.