VIII Muğam televiziya müsabiqəsinin növbəti turu Yaqub Məmmədov adına Ağcabədi rayon Mədəniyyət Mərkəzində keçirilmişdir.
Müsabiqədə Ağcabədi rayon İcra Hakimiyyətinin Başçısı Rafil Hüseynov, YAP Ağcabədi rayon təşkilatının sədri Rövşən Əhmədov, Hüquq Mühafizə orqanlarının rəhbərləri, eyni zamanda Laçın rayonundan dəvət edilmiş qonaqlar, Şəhid ailələri və qazilər, Vətən müharibəsinin veteranları, ziyalılar, rayon ictimaiyyətinin nümayəndələri iştirak etmişlər.
Azərbaycan Respublikasının xalq artistləri Səkinə İsmayılova, Sərdar Fərəcov, Mələkxanım Əyyubova, Mənsum İbrahimov, Nəzakət Teymurova, Teyyub Aslan, Respublikanın əməkdar artisti Fərqanə Qasımova və Azərbaycan Yazıçılar Birliyinin katibi İlqar Fəhmidən ibarət münsiflər heyəti gənc ifaçılar- Həzrət Əzizli, Tahir Şəkiyev, Nərgiz Cabbarova, Daşqın Kürçaylı, Vüsal Qasımov, Ülkər Abdullayev və Fuad Əlizadənin ifa etdikləri muğam və təsnifləri dinləyərək ifaçıların çıxışlarını müvafiq ballarla qiymətləndirmişlər.
Bütövlükdə Ağcabədidə keçirilən Muğam müsabiqəsi ruh yüksəkliyi ilə qarşılanıb, tamaşaçılara xoş ovqat bəxş edib.
Muğam müsabiqəsinin növbəti turu Qarabağ iqtisadi rayonuna daxil olan Ağdam rayonunda keçiriləcəkdir.
