Xocavənd rayon sakini, 1996-cı il təvəllüdlü Qarabağ qazisi Zeynalov Ceyhun Mübariz oğlunun əlilliyinin qiymətləndirilməsi ilə bağlı verilən qərar narazılıq doğurub.

Belə ki, qazi tibb müəssisəsi tərəfindən rəsmiləşdirilən Forma-88 göndərişi əsasında 13 fevral 2026-cı il tarixində Dövlət Tibbi-Sosial Ekspertiza və Reabilitasiya Agentliyində əyani müayinədən keçirilib. Səhiyyə Nazirliyi və Agentliyin həkim-ekspertlərinin birgə müayinəsi zamanı onun hazırkı sağlamlıq vəziyyətinin əlillik təyinatına əsas vermədiyi bildirilib və bu səbəbdən “diaqnozun əlillik əlaməti təyin etməməsi” barədə qərar qəbul edilib.
Lakin yaxınları və məsələ ilə maraqlanan şəxslər bildirirlər ki, qazinin sağlamlıq vəziyyəti ağırdır və onun səhhətindəki problemlər heç vaxt tam şəkildə aradan qalxacaq vəziyyətdə deyil.
Bu səbəbdən Əmək və Əhalinin Sosial Müdafiəsi Nazirliyinə müraciət edilərək Qarabağ qazisi Ceyhun Zeynalovun vəziyyətinin yenidən araşdırılması, tibbi vəziyyətinin obyektiv qiymətləndirilməsi və ona lazımi sosial dəstəyin göstərilməsi xahiş olunur.
Qeyd olunur ki, Vətən uğrunda sağlamlığını itirmiş qazilərin sosial müdafiəsi dövlətin əsas prioritetlərindən biridir və belə halların diqqətdən kənarda qalmaması vacibdir.