Ağstafada növbəti ağacəkmə aksiyası keçirilib
Məlumata görə, rayonun Qırılı, Köçəsgər, Həsənsu, Eynallı, Dağ Kəsəmən, Qarahəsənli kəndləri və Vurğun qəsəbəsini əhatə edən aksiyada rayon icra hakimiyyətinin, hüquq-mühafizə orqanlarının rəhbərləri, idarə və müəssisələrin əməkdaşları iştirak ediblər. Ehtiyac olan ərazilərdə yerli iqlim şəraitinə uyğun olan ümumilikdə 1600 ədəd sərv və küknar tingləri əkilib. Yeni ağaclara zəruri aqrotexniki qulluq göstərilib, həmçinin yaşıllıq zonalarında qurumuş ağaclar çıxarılaraq yeniləri ilə əvəz olunub.
Ağacəkmə aksiyasının keçirilməsində məqsəd yaşıllıqların sayını artırmaqla yanaşı, təbiətə qayğı hissini təbliğ etmək, ictimaiyyətin diqqətini ekoloji tarazlığın qorunmasına, ətraf mühitin sağlamlaşdırılmasına yönəltməkdir.
