Tədrisdə Liderlik və Pedaqoji Bacarıqların Ahəngi

Daxiletmə və müxtəliflik liderlikdə çox önəmlidir. Təhsil sahəsində lider olmaq, yalnız idarəçi olmaqdan daha çoxunu tələb edir. Yaxşı bir təhsil işçisi şagirdlərə və müəllimlərə ilham verir, onlara dəstək göstərir, potensiallarını üzə çıxarmaq üçün əlverişli şərait yaradır və birgə məqsəd uğrunda əməkdaşlıq etməyə təşviq edir.
Bu bacarıqlara malik pedaqoq liderlərdən biri də Bakı şəhəri, Qaradağ rayonunun Səngəçal qəsəbəsində yerləşən Fəzail Qədimov adına 222 nömrəli tam orta məktəbin direktoru Aynur Çingiz qızı Abdullayevadır. O, 20 mart 1978-ci ildə Ağdaş rayonunda anadan olub. 1995-ci ildə Azərbaycan Dövlət Pedaqoji Universitetinin Filologiya fakültəsinə qəbul olub və 1999-cu ildə həmin universiteti bitirib. Pedaqoji fəaliyyətinə 1999-cu ildə 222 nömrəli tam orta məktəbdə başlayıb. 2000–2016-cı illərdə Bakı şəhəri 294 nömrəli tam orta məktəbdə müəllim kimi çalışıb. 5 yanvar 2017-ci ildən 14 oktyabr 2022-ci ilədək həmin məktəbdə direktor vəzifəsini icra edib. 17 oktyabr 2022-ci ildən etibarən isə Fəzail Qədimov adına 222 nömrəli tam orta məktəbin direktoru vəzifəsində çalışır.
Aynur xanım məktəbə rəhbərlik etdiyi illər ərzində tədrisin keyfiyyətinin artırılması istiqamətində müxtəlif üsul və yanaşmalar tətbiq edib. Nümunə olaraq müasir tədris metodlarının tətbiqi, müəllimlərin peşəkarlıq səviyyəsinin yüksəldilməsi, müasir texnologiyalardan və rəqəmsal təhsil resurslarından istifadəni qeyd etmək olar. Məhz düzgün idarəetmənin nəticəsidir ki, məktəbin yüzdən çox məzunu ölkənin müxtəlif nüfuzlu ali təhsil müəssisələrinə qəbul olunub. Ali təhsil müəssisələrindən 222 nömrəli məktəbin pedaqoji kollektivinə və Aynur xanıma təşəkkür məktubları göndərilib. Məktəbin şagirdləri respublika və şəhər səviyyəsində təşkil edilən müxtəlif layihələrdə və olimpiadalarda iştirak edərək uğurlu nəticələr əldə ediblər.
Təhsil müəssisəsi bu illər ərzində yalnız akademik sahədə deyil, həm də ictimai və mədəni fəaliyyətlərdə də uğurlar əldə etmişdir. Məktəb tərəfindən təşkil edilən tədbirlər, sərgilər, konsertlər və idman yarışları şagirdlərin yaradıcılıq qabiliyyətlərinin inkişaf etdirilməsi üçün geniş imkanlar yaratmışdır. Həmçinin məktəb sosial məsuliyyətini dərk edərək, təhsil bərabərliyini, hər bir şagirdin keyfiyyətli təhsil almaq hüququnu təmin etmiş və xüsusi qayğıya ehtiyacı olan şagirdlərə daim dəstək göstərmişdir. Təhsil sahəsində, ictimai fəaliyyətlərdə və sosial məsuliyyətdə göstərilən nailiyyətlər məktəbin keyfiyyətini və onun cəmiyyətə verdiyi töhfəni daha da artırmışdır.
Təhsilin inkişafını təmin edən mühüm sahələrdən biri də məktəb-valideyn əlaqələrinin inkişafıdır ki, bu sahədə də uğurlu addımlar atılmışdır. Valideynlərin məktəb həyatına aktiv olaraq qatılması üçün imkanlar yaradılmış, təhsil prosesinə dair məlumatlandırılmaları müntəzəm olaraq təmin edilmişdir. Hər bir valideynə fərdi yanaşılmış, onların narahatlıqları, gözləntiləri dinlənilmiş, şagirdlərin hərtərəfli inkişafı üçün əməkdaşlıq yüksək səviyyədə təşkil edilmişdir.

Gələcəkdə bu uğurların davam etdirilməsi və daha da genişləndirilməsi Aynur xanımın əsas hədəfidir. Təşkilatçılıq, inzibatçılıq və ictimai xadimlik öhdəliklərini yüksək peşəkarlıqla icra edən Aynur xanım, özünə və komandasına inamı təmin etmiş, ictimaiyyət arasında böyük etimad qazanmışdır. Şəhid və qazi ailələrinə daim hörmət və qayğı ilə yanaşmış, onları məktəbdaxili tədbirlərə dəvət etmiş, müxtəlif görüşlər keçirmiş və hər zaman mənəvi dəstək göstərmişdir.
Pedaqoq liderlər yalnız bilik verən şəxslər deyil, həm də təhsil prosesində ilham verən, hədəf müəyyən edən və inkişaf etdirən şəxsiyyətlərdir. Aynur xanımın strateji hədəfləri ümumilikdə təhsilin keyfiyyətini yüksəltmək, şagirdlərin hərtərəfli inkişafını təmin etmək və təhsil prosesində davamlı inkişafı təmin etməkdən ibarətdir.
Yeni tədris metodikalarını mənimsəyib tətbiq etmək, təhsilin keyfiyyətini yüksəltmək və müasir standartlara uyğunlaşdırmaq məqsədilə Aynur xanım yerli və xarici konfranslarda, elmi seminar və təlimlərdə uğurla iştirak etmişdir. O cümlədən, İstanbul Yeni Yüzyıl Universitetinin Azərbaycan-Türkiyə Təhsil Araşdırmalarının Peşəkar Təcrübə Proqramında, İstanbul Aydın Universitetinin "Təhsil Texnologiyaları və Sinif Təhsili Strategiyaları", Qalata Universitetinin "Təhsil Psixologiyası" və digər təlimlərdə iştirak edərək sertifikatlar qazanmışdır. Qazandığı təcrübə və biliklər məktəbin ümumi inkişafına əhəmiyyətli dərəcədə töhfə vermişdir.
Bakı Şəhəri üzrə Təhsil İdarəsi Həmkarlar Komitəsi tərəfindən pedaqoji fəaliyyətində səmərəli xidmətlərinə görə Aynur xanım "Fəxri Fərman" ilə təltif olunmuşdur.
Aynur xanımın pedaqoq olaraq tədris sahəsindəki peşəkarlığı və ölkənin ictimai-siyasi həyatında göstərdiyi fəaliyyəti Yeni Azərbaycan Partiyasının Qaradağ rayon təşkilatı və Qaradağ Rayon İcra Hakimiyyəti tərəfindən yüksək dəyərləndirilərək "Fəxri Fərman"larla təltif edilmişdir. O, bu fəaliyyətlə şagirdlərinə yalnız biliklər vermir, eyni zamanda vətəndaşlıq borcu və sosial məsuliyyət hissi aşılayır, onları gələcəkdə daha güclü, vətənə sadiq fərdlər kimi yetişmələri üçün dəstəkləyir.
Aynur xanımı 20 mart doğum günü və Novruz bayramı münasibətilə səmimi təbrik edir, ona uzun ömür, sağlamlıq və həyatının hər anında yeni zirvələrə çatmağı diləyirik. Təhsilin inkişafı istiqamətində qarşıya qoyduğunuz hədəfləri gerçəkləşdirərək daha böyük uğurlara imza atacağınıza əminik. Şagirdlərimizin gələcək inkişafı yolunda göstərdiyiniz əvəzsiz səylər, sizin liderlik keyfiyyətlərinizin və əzminizin parlaq nümunəsidir.Sizin rəhbərlik etdiyiniz yolda qarşılaşdığınız hər bir çətinlik, yeni bir imkana çevrilir və atdığınız hər addım, daha böyük uğurların təməlini qoyur.Təhsil sahəsindəki məqsəd və planlarınız yalnız məktəbinizin deyil, həm də bütövlükdə ölkəmizin inkişafına böyük təsir göstərəcək və bu yolda göstərdiyiniz əzmkarlıq, bizə güvən verən ən əhəmiyyətli amildir. Sizə şəxsi həyatınızda və peşəkar fəaliyyətinizdə daim müvəffəqiyyətlər, yeni imkanlar və sonsuz xoşbəxtlik arzulayırıq.
“Həkəri” qəzetinin şöbə müdiri - Şirinova Minə Nadir qızı