Prezident İlham Əliyevin sərəncamı ilə “Elektroenergetika haqqında” qanuna edilən dəyişikliklər qüvvəyə minib.

Dəyişikliklərə əsasən, elektrik enerjisində sabit tarif tətbiq ediləcək.

Qanunda deyilir ki, sabit tarif dedikdə elektrik enerjisinin istehlak səviyyəsindən asılı olmayan sabit xarakterli xərclərin tənzimləyici tərəfindən müəyyənləşdirilən hissəsinin qarşılanması məqsədilə hər bir istehlakçı üzrə tətbiq olunan aylıq tarif elementi nəzərdə tutulur.

Sabit tarifin əsas mahiyyəti şəbəkəyə qoşulan istehlakçıların sabit xərc şəklində aylıq müəyyən vəsait ödəməsindən ibarətdir. Sabit tarif istehlak miqdarı ilə bağlı deyil, istehlakçı kateqoriyasından asılı olmayaraq tətbiq edilir və paylayıcı sistem operatorunun müəyyən xərclərinin qarşılanması üçün istifadə olunur.

Sadə formada desək, mənzili olan, amma orada yaşamayan vətəndaşlar da elektrik enerjisini sabit tariflə ödəyəcəklər.
Ətraflı

Sabit tarifin səviyyəsi hələlik müəyyən olunmayıb. Energetika nazirinin müavini Orxan Zeynalov parlamentin növbədənkənar sessiyasında bildirib ki, sabit tarif hər bir abonent üzrə aylıq 1 manatı aşmayacaq.

Modern.az-ın məlumatına görə, sabiq tarifin məbləğini Tarif Şurası müəyyən edəcək.

Belə ki, yeni dəyişikliyə əsasən, “Elektroenergetika haqqında” qanunun 9.2. maddəsinə, yəni elektroenergetika sektorunda tənzimlənən qiymət və tariflərə sabit tarif də (9.2.6. bənd olaraq) əlavə edilib.

Həmin qanunun 42.5.6.-cı maddəsinə əsasən, qiymət və tariflər müvafiq icra hakimiyyəti orqanının müəyyən etdiyi orqan (qurum) tərəfindən müəyyən olunur. Prezident İlham Əliyevin 2023-cü ildə imzladığı fərmanla burada orqan (qurum) dedikdə Tarif (qiymət) Şurası nəzərdə tutulur.

Beləliklə, elektrik enerjisində sabit tarifin məbləğinin müəyyən edilməsi üçün Tarif Şurasının qərarı gözlənilir.