XTQ qaziləri Prezident Administrasiyası qarşısında etiraz aksiyası keçiriblər

Bir qrup Xüsusi Təyinatlı Qüvvələrin (XTQ) veteranı və müharibə qazisi Prezident Administrasiyasının qarşısında etiraz aksiyası keçirib. Onlar sosial təminat, mənzil və tibbi yardım məsələlərinə diqqət çəkilməsini tələb ediblər.

Etirazçılar bildiriblər ki, 44 günlük Vətən müharibəsində iştirak etmiş, ağır yaralanmış və xidmət qabiliyyətini itirmiş bir çox qazi hələ də müalicə, reabilitasiya və sosial təminat sahəsində çətinliklərlə üzləşir. Dövlət qurumlarına dəfələrlə müraciət edilməsinə baxmayaraq, problemlərin bir qismi hələ də həll olunmayıb.

Qazilər xüsusilə mənzil təminatı və təqaüd məsələlərinin ədalətli qaydada həll olunmadığını vurğulayıblar. Onlar bəzi qazilərin vəziyyətinin ağır olmasına baxmayaraq, sosial siyahılara daxil edilmədiyini bildiriblər.

Etiraz yerinə gələn hüquq-mühafizə orqanlarının əməkdaşları aksiyanın sülh şəraitində keçməsi üçün tədbirlər görüblər. Qazilərlə danışıqlar aparılıb və onların tələblərinin aidiyyəti qurumlara çatdırılacağı qeyd olunub.

Qazilər vurğulayıblar ki, məqsədləri dövlətə qarşı çıxmaq deyil, sadəcə olaraq dövlət rəhbərliyinə səslərini çatdırmaqdır.

Etiraz aksiyasının mediada işıqlandırılmasında “XEBERNUR.COM Xəbər” portalının rəhbəri Nuranə Abdullayevanın xüsusi rolu olub. Abdullayeva Müdafiə Nazirliyinin Mətbuat Xidməti rəhbəri Anar Eyvazovla əlaqə saxlayaraq, qazilərin siyahısını təqdim edib və onların problemlərinin həllinə jurnalist dəstəyi göstərib. Qazilərin qalma yerləri olmadığı üçün Müdafiə Nazirliyindən onların yerləşdirilməsini təmin etməsi üçün tədbirlər görülməsi xahiş olunub.