Polis Akademiyasının müəllimi məktəblilərlə görüş keçirdi

Azərbaycan Respublikasının Daxili İşlər Nazirliyinin Polis Akademiyasının müəllimi, polis polkovnik-leytenantı Ruslan Cəfərov tərəfindən Qaradağ Rayon Polis İdarəsinin əməkdaşlarının iştirakı ilə yuxarı sinif şagirdləri ilə maarifləndirici görüş keçirilib.

Görüş Bakı şəhəri 222 nömrəli tam orta məktəbdə baş tutub. Tədbirin məqsədi şagirdlərə Daxili İşlər Nazirliyinin Polis Akademiyasına qəbul qaydaları, tədris prosesi, gələcək karyera imkanları və polis peşəsinin əhəmiyyəti barədə ətraflı məlumat vermək olub.

Polis polkovnik-leytenantı Ruslan Cəfərov çıxışında qeyd edib ki, Akademiyada təhsil yüksək peşəkar kadrların hazırlanmasına yönəlib və bu ali təhsil ocağı dövlətin hüquq-mühafizə sistemində mühüm rol oynayır.

Daha sonra şagirdlərin sualları cavablandırılıb, onlara qəbul imtahanları, fiziki hazırlıq tələbləri və xidmətə qəbul prosedurları barədə geniş izahat verilib.

Tədbir sonda iştirakçılara gənclərin hüquq-mühafizə orqanlarında fəaliyyətə cəlb olunmasının vacibliyi və vətənpərvərlik ruhunda tərbiyənin əhəmiyyəti ilə bağlı tövsiyələrin verilməsi ilə yekunlaşıb.