Dövlət qurumu 28 vətəndaşın mənzilini təmir edib
Xəbər verilir ki, bu barədə "İçərişəhər" Dövlət Tarix-Memarlıq Qoruğu İdarəsi tərəfindən İçərişəhər və Qala qoruqlarında mədəni irsin mühafizəsi və təbliği üzrə görülən işlərin təqdim olunduğu ilin yekunlarına həsr olunmuş mətbuat konfransında məlumat verilib.
Bildirilib ki, aparılan işlər çərçivəsində 12 yaşayış evinin dam örtüyü təmir edilib, 28 ünvanda sakinlərin mənzillərində əsaslı təmir işləri aparılıb, bir sıra binaların fasadı yenilənib, baxımsız ərazilər təmizlənib.
Ərazidə fiziki əlçatanlığın təmin olunması məqsədilə yeni infrastrukturlar qurulub, məlumatlandırıcı anonslar yerləşdirilib. Bu işlərdə Baku City Circuit şirkəti də dəstək göstərib və qurum tərəfindən şirkət rəhbərliyinə təşəkkür bildirilib.
Yol-nəqliyyat infrastrukturunun yaxşılaşdırılması istiqamətində mövcud yol nişanları yenilənib, beynəlxalq standartlara uyğunlaşdırılıb, mərhələli şəkildə nəzarət və təhlükəsizlik sistemləri qurulub. Bu sahədə aidiyyəti qurumlarla birgə əməkdaşlıq aparılıb.
Qeyd edilib ki, İçərişəhər ərazisində mühüm infrastruktur problemlərindən biri də aradan qaldırılıb. Qala divarları yaxınlığında illərlə toplanan və mənşəyi məlum olmayan sular divarların dayanıqlığı üçün risk yaradırdı. Nazirlər Kabinetinin göstərişi ilə müvafiq qurumların mütəxəssisləri tərəfindən geniş araşdırma aparılıb, su mənbəyi müəyyən edilib və problem faktiki olaraq həll olunub. Qeyd olunub ki, bu proses bir aydan artıq vaxt aparıb və kifayət qədər mürəkkəb olub.
Eyni zamanda ərazidə kommunikasiya və digər texniki infrastrukturlar yenilənib, vizual baxımdan şəhər mühitinə uyğun, təhlükəsiz və funksional qurğular quraşdırılıb. Hazırda digər infrastruktur və xidmət sahələri üzrə işlər mərhələli şəkildə davam etdirilir.
