Abşeronda növbəti qanunsuz tikinti iddiası: Heydər Əliyev prospekti 2 ünvanında nə baş verir?

Abşeron rayonu, Heydər Əliyev prospekti 2 ünvanında aparılan tikinti işləri ictimai narazılıq doğurub. Sakinlərin iddialarına görə, bu ərazidə tikinti şəhərsalma normalarına və qanunvericiliyin tələblərinə zidd şəkildə həyata keçirilir.
Yerində apardığımız müşahidələr və sakinlərin bildirdikləri sual doğurur: bu tikinti üçün rəsmi icazələr varmı, layihə sənədləri haradadır və niyə ictimaiyyətə açıqlama verilmir?
Sakinlər bildirir ki, Abşeron rayonunda son illər qanunsuz tikintilər kütləvi xarakter alıb. İddia olunur ki, bəzi şəxslər üçün qanun işləmir, pul və tanışlıq hesabına istənilən ərazidə istədikləri kimi tikinti aparırlar. Halbuki, sadə vətəndaş ən xırda dəyişiklik üçün belə aylarla qapı-qapı düşməyə məcbur qalır.
Bu isə cəmiyyətdə haqlı olaraq suallar yaradır:
Qanunsuz tikintilərə kim himayədarlıq edir?
Nəzarət orqanları niyə susur?
Bu ikili standart kimlərin maraqlarına xidmət edir?
Dövlətin torpaqları və şəhər infrastrukturu niyə nəzarətsiz buraxılıb?
Şəhərsalma qaydalarının pozulması yalnız hüquqi problem deyil, eyni zamanda təhlükəsizlik, ekologiya və sosial ədalət məsələsidir. Bu cür nəzarətsiz tikintilər gələcəkdə faciələrə, kommunal problemlərə və infrastruktura ciddi ziyan vura bilər.
Abşeron rayonu Heydər Əliyev prospekti 2 ünvanında aparılan tikinti ilə bağlı aidiyyəti qurumlardan – İcra Hakimiyyətindən, Dövlət Şəhərsalma və Arxitektura Komitəsindən və digər məsul strukturlardan rəsmi açıqlama gözlənilir.
Cəmiyyət cavab tələb edir. Susmaq artıq mümkün deyil.