63 yaşlı qadının kartı bloklandı: 563 manatını bir həftədir ala bilmir.

Space TV-də yayımlanan “Gəl danış” verilişinin aparıcısı Amil Xəlil şəxsi Facebook hesabında paylaşım edərək yaşlı bir qadının bank problemi ilə bağlı üzləşdiyi çətinliyi ictimailəşdirib. Aparıcı bildirib ki, 63 yaşlı qadın gündəlik 5–10 manat qazanaraq həmin vəsaiti debet kartına yığıb ki, müalicə xərclərini ödəsin. Lakin ötən gün pulu çıxarmaq istəyərkən kartının bloklandığını görüb.
Paylaşımda qeyd olunur ki, qadın artıq bir həftədir kartında olan 563 manatı götürə bilmir. Məsələ ilə bağlı banka yaxınlaşan vətəndaşa bildirilib ki, kartdakı pulların məhz onun tərəfindən yükləndiyini sübut etməlidir. Əks halda, kartına göndərilən 5–6–7 manatlıq məbləğlərin kim tərəfindən köçürüldüyü araşdırılacaq və yalnız bundan sonra kartın blokdan çıxarılması mümkün ola bilər.
Aparıcı paylaşımında yaşlı qadının faktiki olaraq borclu vəziyyətə salındığını, onun psixoloji təzyiq altında qaldığını da vurğulayıb.
Bununla yanaşı, Amil Xəlil artıq iki gündür Kapital Bank-ın mətbuat xidmətinin əməkdaşı Arzu xanımla əlaqə saxlamağa çalışdığını, lakin vətəndaşın problemi ilə bağlı hələ də hər hansı rəsmi cavab ala bilmədiyini qeyd edib. O, bank rəhbərliyinə şəxsiyyət məlumatlarını da göndərdiyini və məsələnin araşdırılmasını xahiş etdiyini bildirib.
Redaksiyadan əlavə: Qarşı tərəfin – Kapital Bank-ın mövqeyini dinləməyə və yayımlamağa hazırıq. Bank tərəfindən rəsmi açıqlama verilərsə, olduğu kimi oxucularımıza təqdim olunacaq.