Şəhid atası Suləddin Yusifov müraciət etdi: Şəhid anası Yusifova Bəturə Əskər qızının “qara siyahı”ya salındığı iddia olunur.

Şəhid atası Suləddin Yusifov mətbuata müraciət edərək ciddi bir haqsızlığı ictimailəşdirib. Onun sözlərinə görə, həyat yoldaşı şəhid anası Yusifova Bəturə Əskər qızı Kapital Bank tərəfindən heç bir rəsmi əsas və aydın izahat təqdim olunmadan “qara siyahı”ya salınıb.
Suləddin Yusifov bildirir ki, bu qərar ailənin gündəlik maliyyə əməliyyatlarını iflic vəziyyətinə salıb. Bank kartlarından istifadə etməkdə, köçürmələrdə və digər əsas xidmətlərdə məhdudiyyətlər yaranıb. Bu isə onsuz da ağır həyat şəraiti yaşayan şəhid ailəsi üçün əlavə psixoloji və sosial yükdür.
Şəhid atası deyir ki, dəfələrlə banka müraciət etsələr də, onlara konkret və aydın cavab verilməyib. Yalnız “sistem qərarıdır” kimi ümumi ifadələrlə yola verildiklərini bildirir. Bu isə haqlı olaraq suallar doğurur:
Bu sistem kimindir? Hansı meyarlarla işləyir? Şəhid ailəsinə niyə fərqli və daha həssas yanaşma göstərilmir?
Məsələ cəmiyyətdə ciddi narazılıq doğurur. Çünki şəhid ailələri sosial baxımdan xüsusi həssas kateqoriyaya daxildir və onlara münasibətdə daha humanist, şəffaf və vicdanlı yanaşma tələb olunur. Bu cür halların baş verməsi bank sektorunda sosial məsuliyyət anlayışının formal xarakter daşıdığı təəssüratını yaradır.
İctimaiyyət Kapital Bankdan bu iddialarla bağlı rəsmi açıqlama gözləyir. Aidiyyəti dövlət qurumlarının məsələyə müdaxilə edərək araşdırma aparması, şəhid ailəsinin hüquqlarının bərpa olunması və bu kimi halların təkrarlanmaması üçün mexanizmlərin gücləndirilməsi zəruri sayılır.
Şəhid ailəsini incitmək təkcə bir ailəni yox, bütöv cəmiyyəti incitmək deməkdir.