“Nar” inklüziv və bərabər xidmət mühitini gücləndirir.

Sosialyönümlü təşəbbüsləri ilə seçilən “Nar” “Biz Hamımız Birik” adlı yeni DEIB (Müxtəliflik, Bərabərlik, İnklüzivlik və Mənsubiyyət) strategiyası çərçivəsində bərabər və inklüziv xidmət mühitinin formalaşdırılması istiqamətində fəaliyyətini genişləndirir.
Strategiyanın əsas məqsədi mobil rabitə xidmətlərinin əlilliyi olan şəxslər üçün daha əlçatan olmasını təmin etməkdir. Bu çərçivədə “Nar”ın müştəri mərkəzlərində çalışan əməkdaşlar eşitmə məhdudiyyətli abunəçilərə jest dili vasitəsilə xidmət göstərməyə başlayıblar. Sözügedən təşəbbüs müştəri mərkəzlərində ünsiyyətin keyfiyyətini artırmaqla yanaşı, xidmətlərin hər kəs üçün əlçatan olmasına töhfə verir.
Bundan əlavə, ötən ildən etibarən əlilliyi olan şəxslərin rahatlığını təmin etmək məqsədilə “Nar” ofislərində növbədənkənar xidmət tətbiq olunur. “Elmlər Akademiyası” və “Memar Əcəmi” müştəri mərkəzləri isə əlil arabası istifadəçiləri üçün tam uyğunlaşdırılıb. Həmin mərkəzlərdə giriş-çıxış yolları və infrastruktur bu şəxslərin rahat hərəkətini təmin edəcək şəkildə yenidən qurulub.
Qeyd edək ki, inklüziv cəmiyyətin təşviqi məqsədilə “Nar” hələ 2021-ci ildə Azərbaycanda ilk onlayn işarə dili lüğəti olan jestdili.az platformasını istifadəyə verib. Bu təşəbbüsün davamı olaraq, jest dilini daha rahat öyrənməyə imkan verən mobil tətbiqin də yaxın zamanda təqdim olunması planlaşdırılır.
Hazırda 2,2 milyon abunəçiyə xidmət göstərən “Nar” son 6 il ərzində Müştəri Loyallığı İndeksi göstəricisinə əsasən Azərbaycanda lider mobil operator olaraq mövqeyini qoruyur. Bu nəticə “Nar”ın ardıcıl şəkildə həyata keçirdiyi müştəriyönümlü strategiyanın göstəricisidir. Mobil operator istifadəçilərinə sərfəli qiymətlər, dayanıqlı və yüksəkkeyfiyyətli rabitə, geniş internet paketləri və müasir eSIM texnologiyası təqdim edir.