2024-2025-ci tədris ilində Türkiyə-Azərbaycan Universitetinə (TAU) tələbə qəbulu aparılacaq. Abituriyentlər TAU-nun tədris ingilis dilində aparılacaq ixtisaslarını (kompüter mühəndisliyi, sənaye mühəndisliyi, qida mühəndisliyi) seçə bilərlər. Universitetin yerləşəcəyi bina hələlik rəsmi olaraq açıqlanmayıb.



Məlumata görə, ali təhsil ocağının binası Bakının Xətai rayonunda yerləşəcək.



Bildirilir ki, TAU Bakı Ali Neft Məktəbinin (BANM) Xocalı prospektində yerləşən binasına fəaliyyət göstərəcək. BANM-ın 2024/2025-ci tədris ilində yeni binada fəaliyyətini davam etdirəcəyi qeyd olunur. BANM yeni tədris ilində bu il ləğv edilən Bakı Fransız Liseyinin binasında fəaliyyət göstərəcək.



Məsələni dəqiqləşdirmək üçün TAU-nun tədris prosesində iştirak edəcək Azərbaycan Texniki Universiteti və Bakı Ali Neft Məktəbi ilə əlaqə saxladıq.



Azərbaycan Texniki Universitetindən TAU-nun Bakı Ali Neft Məktəbinin binasında fəaliyyət göstərəcəyi barədə məlumat nə təsdiq, nə də təkzib edilib. Bildirilib ki, bu barədə rəsmi açıqlama veriləcək.



BANM-dan isə bildirilib ki, ali təhsil ocağının Xətaidəki filialının yeni binaya köçəcəyi barədə məlumat doğrudur. Qurumun mətbuat katibi yaxın vaxtlarda bu barədə məlumat veriləcəyini bildirib.