Ərdoğan mühüm toplantı üçün Qazaxıstana yola düşdü
Xəbər verilir ki, Ərdoğan əvvəlcə Müstəqillik Sarayında Qazaxıstan Prezidenti Kasım Jomart Tokayev ilə təkbətək görüş keçirəcək. Daha sonra liderlər Türkiyə-Qazaxıstan Yüksək Səviyyəli Strateji Əməkdaşlıq Şurasının iclasına sədrlik edəcəklər.
Danışıqlarda “genişləndirilmiş strateji tərəfdaşlıq” səviyyəsində olan ikitərəfli münasibətlərin bütün istiqamətlər üzrə müzakirə ediləcəyi, həmçinin iki ölkə arasında strateji əlaqələrin daha da gücləndirilməsi üçün atılacaq addımların nəzərdən keçiriləcəyi bildirilir.
Səfərin iqtisadi hissəsində əsas diqqət iki ölkə arasında müəyyən edilən 15 milyard dollarlıq ticarət dövriyyəsi hədəfinə və enerji sahəsində əməkdaşlıq layihələrinə yönələcək. Bu çərçivədə müxtəlif sahələr üzrə yeni əməkdaşlıq protokollarının və sazişlərin imzalanması gözlənilir.
Bundan başqa, Ərdoğan və Tokayevin Türkiyə-Qazaxıstan Biznes Forumunda iştirak edərək hər iki ölkədən olan iş adamları ilə görüşməsi və investisiya imkanlarını müzakirə etməsi planlaşdırılır.
Astana proqramını başa vurduqdan sonra Türkiyə Prezidenti türk dünyasının mənəvi paytaxtı hesab olunan Turkistan şəhərinə yollanacaq. Burada o, Türk Dövlətləri Təşkilatının Qeyri-rəsmi Liderlər Zirvəsində iştirak edəcək.
Məlumata görə, Ərdoğanın zirvə çərçivəsində edəcəyi çıxışda Yaxın Şərqdəki son proseslər başda olmaqla regional və qlobal məsələlərlə bağlı mühüm mesajlar verməsi gözlənilir. Türkiyə lideri həmçinin iştirakçı dövlət və hökumət başçıları ilə ikitərəfli görüşlər keçirəcək.
