Sentyabrın 5-də Sumqayıt Şəhər İcra Hakimiyyətinin başçısı Zakir Fərəcov 5-ci mikrorayon ərazisində sakinlərlə növbəti səyyar qəbul-görüş keçirib. Qəbulun əsas məqsədi vətəndaşların gündəlik qayğı və müraciətlərini birbaşa dinləmək, onların sosial, məişət və infrastrukturla bağlı problemlərinin həllinə operativ yanaşmaq olub.

Görüşdə İcra Hakimiyyətinin məsul şəxsləri ilə yanaşı, şəhərdə fəaliyyət göstərən xidmət sahələrinin rəhbərləri – kommunal təsərrüfat, məşğulluq, səhiyyə, təhsil, sosial müdafiə və digər aidiyyəti qurumların nümayəndələri iştirak ediblər.

Sakinlərin səsləndirdiyi müraciətlər diqqətlə dinlənilib, qaldırılan məsələlərin bir qisminin yerində həlli üçün dərhal müvafiq tapşırıqlar verilib. Vaxt və mərhələli icra tələb edən problemlər isə aidiyyəti strukturların icraatına yönəldilib, icra prosesinə nəzarətin xüsusi olaraq diqqət mərkəzində saxlanacağı vurğulanıb.

Şəhər rəhbəri çıxışında qeyd edib ki, hər bir vətəndaş müraciəti diqqətlə araşdırılır və həll olunması üçün bütün mövcud imkanlardan istifadə edilir. Vətəndaşların gündəlik həyat şəraitinin yaxşılaşdırılması, şəhərdə mövcud sosial və infrastruktur məsələlərinin həlli İcra Hakimiyyətinin fəaliyyətində prioritet istiqamətlərdəndir.

Qeyd edək ki, Sumqayıt Şəhər İcra Hakimiyyətinin mütəmadi olaraq təşkil etdiyi səyyar qəbul-görüşlər sakinlərlə birbaşa ünsiyyətin gücləndirilməsinə, onların problemlərinin yerində araşdırılaraq qısa müddətdə həllinə xidmət edir.