“Füzuli bağçasında təlatüm: bağça müdirinə aid olduğu iddia edilən səs yazısı yayıldı”

Füzuli Rayonunun Qayıdış qəsəbəsində yerləşən 9 saylı Körpələr Evi–Uşaq Bağçası ilə bağlı daha bir şikayət gündəmə gəlib. Bağçanın işçisi Ceyran Rüstəmova rəhbərlik tərəfindən ona qarşı müxtəlif hüquq pozuntularına yol verildiyini iddia edir.

Şikayətçinin sözlərinə görə, o, məsələ ilə bağlı Dövlət Əmək Müfəttişliyi Xidmətinə də müraciət edib. Onun iddiasına görə, xidmətin Qarabağ regional əməkdaşı Məmməd Məmmədov bağça müdiri Ülviyyə Əjdərzadəyə məlum məlumatlar verib və müəssisənin yenidən cərimələnə biləcəyini bildirib.

Rüstəmovanın sözlərinə görə, həmin xəbərdarlıqdan sonra Ülviyyə Əjdərzadə təcili bağçaya gələrək onu aşağı vəzifə və aşağı əməkhaqqı ilə yeni müqavilə imzalamağa məcbur edib, razılaşmadığı halda isə işdən çıxarılacağı ilə bağlı şifahi xəbərdarlıq edib. Şikayətçi bildirir ki, bu barədə səs yazısı da mövcuddur.

İddiaya görə, 31 iyul 2024-cü ildə bağça müdiri tərəfindən əmr tərtib olunub, lakin sistemdə qüvvəyə minmədən ertəsi gün – 1 avqust 2024-cü ildə Rüstəmovanın işə gəlməsinə etiraz edilib və polis çağırılaraq onun bağçaya girişinə maneə yaradılıb.

Şikayətçi daha bir iddiasında bildirir ki, 3 iyul 2024-cü ildə Ülviyyə Əjdərzadənin digər əməkdaşlarla söhbəti zamanı işçilərə “okladın artırılması üçün pul tələb edildiyi” barədə məlumat verilib. Onun sözlərinə görə, bu söhbətdə dayələrdən 1000 manat, tərbiyəçilərdən isə 1100 manat istənildiyi deyilib. Hətta müəyyən məbləğ qarşılığında vəzifə dəyişikliklərinin mümkün olduğu iddia olunub.

Hazırda səsləndirilən bütün iddialarla bağlı bağça rəhbərliyinin, Təhsil Nazirliyinin və Dövlət Əmək Müfəttişliyi Xidmətinin mövqeyi açıqlanmayıb.