Güloğlan Cabbarlı: İdman xarakter formalaşdıran həyat məktəbidir.

Dünya çempionu, Prezident mükafatçısı, hüquqşünas və Azərbaycan Çin Döyüş Növləri Assosiasiyası Kung-Fu Federasiyasının Hakimlər Kollegiyasının sədri Güloğlan Cabbarlı idmanın gənclərin formalaşmasındakı rolundan danışıb.
Onun sözlərinə görə, idman təkcə fiziki məşq deyil, eyni zamanda insan xarakterini formalaşdıran mühüm həyat tərzidir. Güloğlan Cabbarlı bildirib ki, idmanla məşğul olan gənclər yalnız güclü bədən deyil, həm də möhkəm iradə, sağlam düşüncə və yüksək mənəvi ruh qazanırlar.
“Hər məşq insanı daha çevik, daha dözümlü və daha özünəinamlı edir. İdman intizam yaradır, məsuliyyət hissini gücləndirir və gənci məqsədinə doğru addım-addım irəliləməyə öyrədir”, deyə o vurğulayıb.
Güloğlan Cabbarlının fikrincə, idmanla böyüyən gənclər təkcə fiziki baxımdan deyil, eyni zamanda daxili gücü, liderlik qabiliyyəti və düzgün həyat baxışı ilə seçilirlər. O qeyd edib ki, idman həm də dostluq, yoldaşlıq, kollektivlik və bir-birinə dayaq olmaq kimi dəyərləri aşılayır.
Bu dəyərlərin gənclərdə vətənpərvərlik və milli məsuliyyət hissini daha da gücləndirdiyini deyən Cabbarlı əlavə edib:
“Unutmayaq ki, güclü gənclik güclü gələcək deməkdir. İdmanla böyüyən nəsil sağlam düşünən, sağlam qərar verən və sağlam cəmiyyət quran nəsildir.”