Səhiyyə Sistemində Faciəvi Durum: Onkoloji Xəstələrin Haqları Tapdanır

Jurnalist Aytən Məmmədova öz “Facebook” hesabında Azərbaycan səhiyyəsindəki acınacaqlı vəziyyəti gündəmə gətirib. Onun paylaşımında göstərilir ki, bir ailədə iki onkoloji xəstə – biri 25, digəri 62 yaşında – ağır şəraitdə yaşayır. Onlar nə müalicə ala bilir, nə də normal qidalanma imkanına sahibdir.

Məlumata görə, xəstələrdən birinə görə ödənilməli olan bülleten pulu 5 aydır ki, köçürülmür. Dövlət Sosial Müdafiə Fondu isə məsuliyyəti Şabran Rayon Mərkəzi Xəstəxanasına yönəldir: “Xəstəlik vərəqəsi düzgün tərtib olunmayıb, səhvlər aradan qaldırıldıqdan sonra ödəniş köçürülə bilər.” Lakin xəstəxana aylarla bu səhvi düzəltmir, nəticədə isə vətəndaşlar əzab içində qalır.

Jurnalistin sözlərinə görə, “bu səhiyyə sistemi müalicə etmir, heç olmasa, insanları acından öldürməsin.”

Mövzu ictimaiyyətdə ciddi narazılıq yaradıb. Haqqı tapdanan xəstələrin ailəsi isə aylardır bürokratik süründürməçiliyin və məsuliyyətsizliyin qurbanına çevrilib.