Təcili Tibbi Yardımda ciddi narazılıq: vətəndaş pul tələbi və təhqir iddiası ilə çıxış etdi
Təcili Tibbi Yardımda ciddi narazılıq: vətəndaş pul tələbi və təhqir iddiası ilə çıxış etdi.
Təcili tibbi yardım sistemində baş verən hadisə ictimai narazılığa səbəb olub.
Evə çağırılan təcili tibbi yardım briqadasının həkimi Rəksanə İbrahimovanın ilkin tibbi yardım göstərilməsi zamanı vətəndaşdan pul tələb etdiyi iddia edilir.
Şikayətçi bildirir ki, məsələ ilə bağlı aidiyyəti quruma müraciət etdikdən sonra Təcili Tibbi Yardımın rəhbərliyi tərəfindən idarəyə dəvət olunub. Lakin idarəyə gəldikdə müdirin yerində olmadığı, onun əvəzinə müdir müavini ilə görüş keçiriləcəyi deyilib.
İddialara əsasən, görüş zamanı Rəksanə İbrahimova otağa daxil olaraq şikayətçiyə qarşı etik normalara zidd davranış sərgiləyib, onu təhqir edib və şərəf və ləyaqətini alçaldan ifadələr işlədib. Vətəndaş qeyd edir ki, şikayətinin araşdırılması əvəzinə təzyiq və psixoloji basqı ilə üzləşib.
Baş verənlər təcili tibbi yardımın pulsuz xidmət prinsiplərinə, həmçinin tibb işçilərinin peşə etikası qaydalarına zidd kimi qiymətləndirilir. Hadisə Təcili Tibbi Yardım sistemində nəzarət mexanizmlərinin zəifliyi ilə bağlı ciddi suallar doğurur.
Məsələ ilə bağlı aidiyyəti qurumlardan obyektiv araşdırma aparılması, adı çəkilən həkimin və prosesdə məsuliyyəti olan şəxslərin hərəkətlərinə hüquqi qiymət verilməsi tələb olunur.
Qarşı tərəfin mövqeyini dərc etməyə hazırıq.
