Muğamın səsi yenidən Ağdamdan UCALDI
Prezident İlham Əliyev və birinci xanım Mehriban Əliyevanın iştirakı ilə keçirilən mərasimdə səslənən "Qarabağ şikəstəsi" isə ən təsirli anlardan biri idi.
Tədbirdə Xalq artisti Mənsum İbrahimov da iştirak edirdi, danışan sənətkar bu günü gözləməyin necə böyük bir həsrət olduğunu belə ifadə etdi:
"Çünki bu torpaqlara həsrət qalmışdıq. Şükür Allaha cənab Prezident, Ali Baş Komandanın rəhbərliyi ilə ordumuz torpaqlarımızı işğaldan azad etdi. Allah şəhidlərimizə rəhmət etsin, qazilərimizə can sağlığı versin. Bu gün bütün Qarabağ torpaqlarında sürətlə quruculuq işləri gedir. Muğam Mərkəzinin Ağdamda açılması təbii ki, mədəniyyət hadisədir. Cənab Prezidentin yanında ifa etməyimiz təbii ki, bizim üçün qürur hissi idi. Azərbaycan mədəniyyətinin təntənəsi idi".
"Orada Arif Babayev də olmalıydı"
"Əlbəttə, Qarabağdan olan sənətkarlar - məsələn Arif Babayev səhhəti ilə əlaqədar iştirak etmədi. Amma o burada olmalıydı. Böyük sənətkarlarımız - Əbülfət Əliyev, Rəmiş iştirak etməliydi. Əlbəttə, bizim dünyasını dəyişən insanların hamısı yadıma düşdü", - o deyib.
"Prezidentə 2018-ci ildə dediyi sözləri xatırlatdım"
"Açılışda muğam ifa edən uşaqlar Ağdam rayonu Gülablı Qaçqın Uşaq Musiqi məktəbinin şagirdləridir. Bizə deyiləndə ki, bizə 2-3 uşaq lazımdır. Biz onu Təyyarla axtarıb tapdıq. Balaca uşaq Ağdamın Sarıcalı kəndindən, digər oğlan Şuşadan, qızımız isə İsmayıllıdandır. Üçü də Gülablı məktəbinin şagirdləridir. Cənab Prezidentin 2018-ci ildə Quzanlıda "tezliklə Ağdamın mərkəzində böyük, möhtəşəm Muğam Mərkəzi inşa edəcəyik" sözlərini onunla söhbət xatırlatdım. O isə mənə dedi ki, "əlbəttə, mən bunu xatırlayıram". Xoş səmimi söhbət oldu. Muğam sənətində diqqət və qayğısına görə həm Prezident İlham Əliyevə, həm də Birinci vitse-prezident Mehriban Əliyevaya təşəkkür etdik. Qarabağın alınması, orada görülən bərpa-quruculuq işlərinə görə camaatımız adından təşəkkür etdik. Düşünürəm ki, Qarabağın hər bir rayonunda belə mədəniyyət mərkəzləri olacaq. Hamısının açılışını gözləyəcəyik".
