Hacıqabul rayonu Udullu kənd sakini, mərhum qazi Qocayev Kənanın atası Qocayev Davud acınacaqlı vəziyyətdə yaşayır. O, dəfələrlə Hacıqabul Rayon İcra Hakimiyyətinə müraciət etsə də, heç bir köməklik ala bilmədiyini bildirir.

Qocayev Davudun sözlərinə görə, ailəsini dolandırmaq üçün yardıma möhtac qalmaq istəmir. Onun yeganə arzusu işləyərək öz halal zəhməti ilə ailəsini təmin etməkdir:

“Mən kiminsə qarşısında əlimi uzatmaq istəmirəm. İstəyim budur ki, işim olsun, öz zəhmətimlə ailəmə baxım,” – deyə o, müraciətində bildirib.

Məsələ ilə bağlı jurnalistlər Hacıqabul Rayon İcra Hakimiyyətinə və Əmək və Əhalinin Sosial Müdafiəsi Nazirliyinə sorğu ünvanlayıblar. Sorğuda qazi atasının müraciətlərinin cavabsız qalmasının səbəbləri və onun üçün iş imkanlarının yaradılıb-yaradılmayacağı ilə bağlı suallar yer alıb.

Qazi və şəhid ailələrinin sosial müdafiəsi dövlət siyasətinin prioritet istiqamətlərindən hesab olunduğu halda, Qocayev Davudun vəziyyəti ictimaiyyət arasında narahatlıq doğurub.


Hazırda gözlər aidiyyəti qurumların bu məsələyə göstərəcəyi reaksiyada və atacağı addımlardadır.