240 nömrəli məktəbdə biabırçılıq: Təhsil yox, dərs cədvəli belə yoxdur!

Bakı şəhəri, Nəsimi rayonu, 240 nömrəli məktəb illərdir qalmaqallarla gündəmə gəlir. Yeni tədris ili başlayıb, amma vəziyyət dəyişməyib. Əksinə, məktəbin adı bu dəfə də idarəetmədəki xaos və bacarıqsızlıq səbəbindən hallanır.

Tədris ili başlayıb, amma məktəbdə dərs cədvəli hələ də hazır deyil. Uşaqlar günlərlə məktəbə gəlir, amma dərs keçilmir.
Müəllimlər öz planlarını qura bilmir, dərslər qarışıq şəkildə keçirilir, bəzən isə ümumiyyətlə keçirilmir.

Valideynlər haqlı olaraq qəzəblidirlər:

“Uşaq məktəbə gedir, amma dərs yoxdur. Sinif var, müəllim var, amma sistem yoxdur. Əgər ən sadə dərs cədvəlini belə qura bilmirlərsə, bu məktəb nə üçündür?”

Bu vəziyyət təkcə məsuliyyətsizlik deyil, həm də təhsil adına açıq-aşkar biabırçılıqdır.

Məktəbin rəhbərliyi dəyişsə də, nəticə sıfırdır. İdarəçilikdə sistem yoxdur, dərs bölgüsü qarışıqdır, müəllimlər arasında ədalətli paylanma yoxdur. Məktəbdə hər addımda pərakəndəlik hiss olunur.

Valideynlərin sözlərinə görə, yerindən duran rəhbər kreslosuna iddia edir.
Belə məktəb idarəçiliyi normal qayda ilə yox, təsadüflərlə işləyir.
Bu isə şagirdlərin gələcəyinə ən böyük zərbədir.

“Əgər məktəb uşaqların təhlükəsizliyini belə təmin edə bilmirsə, övladımızı ora necə etibar edək?”

240 nömrəli məktəb bu gün təhsil müəssisəsi yox, idarəetmə bacarıqsızlığının simvoluna çevrilib. Şagirdlər vaxt itirir, müəllimlər çaşqınlıq içindədir, valideynlər isə hər gün narazılıq bildirir.

“Məktəb var, amma dərs yoxdur. Müəllim var, amma plan yoxdur. Rəhbərlik var, amma bacarıq yoxdur. Bu, sadəcə utancdır!” – deyə valideynlər kəskin etiraz edirlər.

Rəsmi qurumların susqunluğu – ikinci biabırçılıq

Bütün bu narazılıqlara baxmayaraq, məsul qurumlardan – Təhsil Nazirliyi və Bakı Şəhəri Təhsil İdarəsindən – hələ də ciddi açıqlama yoxdur. Valideynlər haqlı olaraq hesab edirlər ki, bu cür biabırçılıq dövlət qurumlarının gözləri qarşısında baş verirsə, deməli məsuliyyət yalnız məktəb rəhbərliyində deyil.

240 nömrəli məktəbdə yaşananlar artıq sadə çatışmazlıq deyil – təhsil adına ləkədir. Ən sadə təşkilati məsələ olan dərs cədvəlini belə təmin edə bilməyən rəhbərlik məktəbin gələcəyini idarə etmək iqtidarında deyil.

Əgər bu xaos dərhal dayandırılmasa, 240 nömrəli məktəb Bakı təhsilinin ən böyük biabırçılığı olaraq tarixdə qalacaq.