“Uzun İllərin Zəhməti Görməzdən Gəlinir – Halə Hacıyeva, Sənan Mənsimli və Tahir Abbasov Haqsız Qərarlara İmza Atır”

Ağdamda müəllimə siniflərin bağlanması ilə bağlı haqsızlığa etiraz edir.

Ağdam rayon 14 saylı Texniki Fənlər Təmayüllü Məktəbdə uzun illər sinif müəllimi kimi fəaliyyət göstərən Alışanova Zeynəb İlyas qızı təhsil sahəsində qarşılaşdığı ciddi haqsızlıqlardan xəbər verir.

Müəllimə bildirir ki, 2025-2026 tədris ilində birinci sinif və 1_A sinfi tədris edib.
Hər iki sinifdə ümumilikdə 33 şagird mövcud idi. Lakin 2024-2025 tədris illəri ərzində şagirdlərin bir qismi məktəbi tərk edib və nəticədə hər iki sinifdə şagird sayı 30-a düşüb.
Bu səbəbdən müəllimənin sözlərinə görə, siniflərin bağlanması planlaşdırılıb, halbuki dərslərin normal təşkili üçün şagird sayı yetərli idi.

“İki sinifin dərs fəaliyyətini davam etdirməsi üçün yetərli şagird qalmalı idi. Lakin bir şagirdin çatışmazlığı səbəbindən mənim sinfim bağlanmaq təhlükəsi ilə üzləşdi”, – deyə Zeynəb müəllimə bildirib.

Müəllimə vurğulayıb ki, bu qərar uzun illər verdiyi pedaqoji xidmətlərin və sosial təminatının görməzdən gəlinməsidir. O, məsələ ilə bağlı Qarabağ Regional Təhsil İdarəsinin müdiri Sənan Mənsimli, Ağdam rayon 14 saylı məktəbin direktoru Halə Hacıyeva və Ağdam Təhsil İdarəsinin müdiri Tahir Abbasov ilə görüşüb. Onun sözlərinə görə, rəhbərlik məsələni obyektiv və ədalətli şəkildə həll etməyib.

“38 ildən artıq pedaqoji fəaliyyət göstərmişəm. Diagnostik imtahanlarda və digər qiymətləndirmələrdə uğur qazanmışam. Amma sinifim şagird çatışmazlığına görə bağlanmaq təhlükəsi ilə üzləşdi. Bu, həm mənim, həm də şagirdlərimin gələcəyinə birbaşa təsirdir”, – deyə müəllimə bildirib.

Zeynəb müəllimə həmçinin sosial vəziyyətini də diqqətə çatdırıb: onun himayəsində 78 yaşlı anası var və əlavə gəlir mənbəyi mövcud deyil. Siniflərin bağlanması onun maddi və sosial durumunu kritik vəziyyətə sala bilər.

Müəllimə sərt tənqid edir ki, təhsil sistemində uzun illərin zəhmətinə məhəl qoyulmur, pedaqoji fəaliyyət və təcrübə qiymətləndirilmədən qərarlar qəbul edilir. O, aidiyyəti qurumlardan tələb edir ki, bu haqsızlıq dərhal aradan qaldırılsın və şagirdlərin təhsili təhlükəyə atılmasın.

“Mən bütün ömrümü şagirdlərimin təhsili və inkişafına sərf etmişəm. İndi isə məni görməzdən gəlirlər. Bu, həm sosial haqsızlıqdır, həm də təhsil sistemində ciddi problem yaradır”, – deyə Zeynəb müəllimə əlavə edib.