QHT-lər qazilərin adından sui-istifadə edir – Ceyhun Ağayev sərt çıxış etdi

Qazi Ceyhun Ağayev saytımıza verdiyi müsahibədə ölkədə fəaliyyət göstərən bəzi müharibə yönümlü QHT-lərin fəaliyyətsizliyini və korrupsiyasını sərt tənqid edib. Onun sözlərinə görə, bu təşkilatların sədrləri yalnız şəxsi maraqlarını güdür, qaziləri və şəhid ailələrini alət kimi istifadə edirlər.

Ağayev bildirib ki, bəzi QHT-lər dövlətin ayırdığı layihə və tender vəsaitlərini mənimsəyir, guya fəaliyyət göstərirmiş kimi bir neçə qazini və şəhid ailəsini fotoqrafiya üçün istifadə edirlər. Onun sözlərinə görə, bu davranış qazilərin nüfuzuna zərbə vurur və dövlət vəsaitinə hörmətsizlikdir.

“Bir qrup qazini bir yerə toplayaraq şəhərdə parklanma yerlərini və torpaq sahələrini zəbt edirlər, küçə ticarəti ilə məşğul olurlar. Bu artıq şəxsi maraqlara xidmət edən açıq cinayətə bənzəyir,” – deyə Ağayev bildirib.

O, xüsusi olaraq “Azərbaycan Vətənpərvərlər İctimai Birliyi”nin təsisçisi və sədri Elvin Mahmudzadəni misal gətirib:

“Elvin Mahmudzadə qazilərin adından istifadə edərək ictimai fikrə təsir göstərir. Mən faktlar və sübutlarla danışırıq. Əgər o, bunu təkzib etmək istəyirsə, məni məhkəməyə versin – mən ona açıq şəkildə göstərərəm ki, qazilərin adından hansı yerləri zəbt edib, hansı polis idarələrinə təsir göstərib,” – Ağayev qeyd edib.

Qazi hesab edir ki, belə QHT-lərin fəaliyyəti ciddi araşdırılmalıdır, dövlət vətəndaşların etibarını sui-istifadədən qorumaq üçün addımlar atmalıdır:

“Bu təşkilatlar qazilərin və şəhid ailələrinin arasında qarışıqlıq yaradır, ictimai etimadı pozur. Dövlət qurumlarından tələb edirik ki, onların fəaliyyəti dərhal yoxlanılsın və hüquqi qiymət verilsin.”

Qeyd: Qarşı tərəf – adı çəkilən QHT və Elvin Mahmudzadə saytımıza öz mövqeyini təqdim edə bilər. Redaksiya obyektivlik prinsiplərinə sadiq qalaraq həmin açıqlamaları dərc etməyə hazırdır.