Qaçqınkom sədrinə sərt etiraz: “Atam bu torpaq uğrunda canını verdi, mən isə 1 sot torpaq tapa bilmirəm!

Agdam şəhər sakini, Birinci Qarabağ müharibəsi qəhrəmanın övladı Qaçqınların və Məcburi Köçkünlərin İşləri üzrə Dövlət Komitəsinin fəaliyyətindən narazılıq edir. O, illərdir müraciətlərinə baxılmadığını, evlə təmin olunmadığını bildirir.

Vətəndaşın sözlərinə görə, 1993-cü ildən bəri çətin şəraitdə yaşayır, lakin bu günə qədər Qaçqınkom tərəfindən heç bir mənzil və ya yardım göstərilməyib.

“Mən Ağdam şəhərində anadan olmuşam. 1993-cü ildən bəri sürünürəm, amma Qaçqınkom məni bir evlə belə təmin etməyib. Dəfələrlə sədr Rövşən Rzayevə müraciət etmişəm, amma heç bir cavab almamışam. Ya məni öz torpağıma qaytarsınlar, ya da burada başımı soxmağa bir daxma versinlər. Daha dözə bilmirəm,” – deyə o bildirir.

Vətəndaş iddia edir ki, Qaçqınkomun balansında olan evlər məcburi köçkünlərə deyil, yerli sakinlərə satılır:

“Qaçqınkomun balansındakı evlər yerli camaata satılır, amma bizə ‘yer yoxdur’ deyirlər. Budurmu sizin haqq-ədalətiniz? Budurmu qaçqınlara sahib çıxmaq?”

O, sədr Rövşən Rzayevə kəskin suallar ünvanlayıb:

“Əgər qaçqın, məcburi köçkün statusunu götürübsə, bəs orada niyə oturmusan, ay Rövşən Rzayev? Niyə bizə qənim kəsilmisən? Mən Birinci Qarabağ döyüşlərində canını fəda etmiş bir kişinin övladıyam. Atam bu torpaq uğrunda canını verdi, amma onun balası bu gün 1 sot torpaq belə tapa bilmir. Bu, ədalət deyil – bu, vicdansızlıqdır!”