Nəsimi rayonunda qalmaqallı vəziyyət: İran vətəndaşının zirzəmədə bar açması iddiası sakinləri hiddətləndirib

Xebernur.com xəbər verir ki, Nəsimi Rayonunun Bəşir Səfəroğlu 150 ünvanında yayılan iddialar cəmiyyətin ciddi narazılığına səbəb olub. Sakinlərin söylədiyinə görə, həmin ünvanda yaşayan İran vətəndaşı evin zirzəmisində bar tipli obyekt açaraq bina sakinlərinin təhlükəsizliyini birbaşa risk altına qoyub.

Evin sahibi bildirir ki, zirzəmidə aparılan fəaliyyətlə bağlı ona heç bir xəbərdarlıq edilməyib və o, fakt qarşısında qoyulub:

“Mənə məlumat verilmədən, icazə alınmadan evimin zirzəmisində fəaliyyət qururlar. Bu, açıq-aşkar ədalətsizlikdir. Məhkəmə hakimi Həbibə Miriyeva da, Mədəniyyət Nazirliyi də, Nəsimi Rayon İcra Hakimiyyəti də məni haqsız çıxarmağa çalışır.”

Sakinlər deyir ki, barın fəaliyyəti gecə saatlarına qədər səs-küy, təhlükəsizlik qaydalarının pozulması, yanğın və sosial risklər yaradaraq yaşamağı dözülməz edir. İnsanlar hesab edir ki, bu cür obyektin yaşayış binasında fəaliyyət göstərməsi nə qanunlara, nə də normal məntiqlə idarəçiliyə sığır.

Ən kəskin sual isə budur: Niyə aidiyyəti qurumlar şikayətlərə baxmaq əvəzinə, vətəndaşın mülkiyyət hüququnu müdafiə etməkdən yayınır? Niyə sakinlərin təhlükəsizliyi bu qədər ucuzlaşdırılır? Kimlər bu fəaliyyətə göz yumur?

Sakinlər tələb edir ki, məsələ qərəzsiz araşdırılsın, qanunsuzluq varsa dərhal dayandırılsın və insanların hüquqları tapdanmasın.