Birinci Qarabağ müharibəsinin ən gənc iştirakçılarından olan Rahib Şərifov Zirəddin oğlu cəmi 13 yaşında ordu sıralarına qoşulub. Azyaşlı olmasına baxmayaraq, 1992–1996-cı illərdə Ağdam, Füzuli, Kəlbəcər və digər bölgələrdə gedən döyüşlərdə iştirak edib, əsl yeniyetmə əsgər kimi Vətənin müdafiəsinə qalxıb.

1994-cü ildə Müdafiə Nazirliyinin hərbi studiyasında xidmət edən tanınmış yazıçı Nəriman Əbdülrəhmanlı onunla video-müsahibə çəkmişdi. Həmin görüntülərdə 13 yaşlı uşağın cəbhədə necə böyük cəsarət göstərdiyi açıq şəkildə görünürdü. O döyüşkən uşağın bu gün hansı həyatı yaşadığı isə çoxlarını maraqlandırır.

Bu gün Rahib Şərifovun 48 yaşı var. Uzun illərdir ki, Ukraynada yaşayır.
Lakin onu ən çox incidən məsələ – döyüş yolu olan bir insanın bu günə qədər “veteran” statusu ala bilməməsidir.

13 yaşında silaha sarılan bir döyüşçü hansı səbəbdən hələ də tanınmır?
Bu igid niyə zabit olmaq şansından məhrum edilib?
Onu kim küsdürdü?
Onun xidmətinə hüquqi qiymət verilməməsinin səbəbi nədir?
Müdafiə Nazirliyi niyə bu məsələyə biganə yanaşır?
Müharibədə 13 yaşında döyüşən bir uşağın bu gün 48 yaşında haqqını axtarmağa məcbur qalması həm mənəvi, həm də hüquqi cəhətdən ciddi narazılıq doğurur.

Xebernur.com saytı olaraq xahiş edirik ki, Müdafiə Nazirliyi və aidiyyəti qurumlar bu məsələ ilə bağlı ciddi addımlar atsın, Rahib Şərifov Zirəddin oğlunun döyüş yolu araşdırılsın və haqqı olan veteranlıq statusu verilsin.
Belə igidlər Vətəni tərk etməməli, əksinə, Vətən onları tanımalı, qiymətləndirməlidir.
13 yaşında Qarabağda döyüşən bir qəhrəmanı küsdürmək bu xalqa yaraşmır.