Bakının Nərimanov rayonu ərazisində, dəmiryolunun mühafizə zolağında yerləşən evlərin sökülməsi nəticəsində 175 ailə yaşayış yerini itirib. Sakinlərin sözlərinə görə, söküntü prosesi barədə əvvəlcədən yetərli məlumat verilməyib və onlara nə alternativ mənzil, nə də adekvat kompensasiya təqdim olunub.

Evləri dağıdılan vətəndaşlar məsələ ilə bağlı Nazirlər Kabinetinə rəsmi ərizə ilə müraciət ediblər. Lakin indiyədək onların müraciətlərinə hər hansı konkret cavab verilmədiyi bildirilir.

Sakinlər qeyd edirlər ki, illərlə yaşadıqları ərazidən xəbərdarlıq edilmədən çıxarılmaq və kompensasiya ala bilməmək onların sosial vəziyyətini daha da ağırlaşdırıb. Onlar prosesin şəffaf aparılmamasından, cavabdeh qurumların məsuliyyət daşımamasından narazıdırlar.

Hazırda zərərçəkmiş ailələr məsələnin həll olunması üçün Prezident İlham Əliyevdən kömək istəyirlər, onların hüquqlarının bərpa ediləcəyinə ümid edirlər.