Suraxanıda ərazi zəbt edildiyi iddia olunur – Sakinlər İcra Hakimiyyətini qanunsuzluqda suçlayır

Suraxanı rayonunda bir qrup sakin yaşadıqları məhəllədə ciddi qanunsuzluqların baş verdiyini iddia edir. Onların sözlərinə görə, rayon İcra Hakimiyyəti heç bir xəbərdarlıq və rəsmi sənəd təqdim etmədən yaşayış sahələrinə müdaxilə edib, evlərin qarşısındakı əraziləri zəbt edib.

Sakinlər bildirirlər ki, uzun illərdən bəri istifadə etdikləri və mülkiyyətinə daxil olan sahələr qəfil çəpərlənib, bəzi yerlərdə yol və giriş-çıxış məhdudlaşdırılıb. Onların fikrincə, bu addımlar nə qanuna, nə də vətəndaşların hüquqlarına uyğun gəlir.

Şikayətçilər vurğulayırlar ki, əraziyə müdaxilə zamanı heç bir rəsmi qərar, sərəncam və ya izah verilməyib. Bu isə sakinləri haqlı olaraq narahat edir və suallar doğurur: bu tədbirlər hansı hüquqi əsasla həyata keçirilir?

Hazırda sakinlər aidiyyəti dövlət qurumlarından məsələyə müdaxilə edilməsini, araşdırma aparılmasını və qanunsuzluq hesab etdikləri prosesə dərhal son qoyulmasını tələb edirlər.

Rayon İcra Hakimiyyətindən isə hələlik iddialarla bağlı rəsmi açıqlama verilməyib.