Müşviq Gözəlovun həyatını xilas etdiyi Sərxan evə buraxılıb

“O gün küçələr yenə öz adi həyatını yaşayırdı. Heç kim bilmirdi ki, taleyin görünməz tərəzisində bir uşağın nəfəsi ilə bir insanın vicdanı qarşı-qarşıya dayanacaq”.

“Azadmediatv.com” xəbər verir ki, bu haqda Daxili İşlər Nazirliyinin Mətbuat xidmətinin rəisi polis polkovnik-leytenantı Elşad Hacıyev ötən il dekabrın 25-də Bakının mərkəzi küçələrinin birində baş verən qəza zamanı piyada səkisində xəsarət alan 10 yaşlı Sərxanın müalicə aldıqdan sonra evə buraxılarkən yayılan görüntülərinə sosial şəbəkə hesabında münasibət bildirərkən belə yazıb:

“Polis polkovnik-leytenantı Müşviq Gözəlov hadisəni görəndə xidmətdə idi, amma onun ani qərarı oldu. O, xilas etməyə tələsirdi. Heç qəza törədənlərlə maraqlanmadı. Daha vacib olan həyat idi.

Təcili yardımı gözləmədən uşağı xidməti avtomobillə xəstəxanaya çatdırdı. Valideynləri gələnədək tibb personalının yanında dayandı, reanimasiyanın qapısı önündə sükut kimi dikildi.

O dəqiqələrdə biz o uşağın adını bilmirdik. Ad bəlkə də ən xırda şey idi. Əsas olan bir insan ömrünün sönməməsi idi. Hər zəngimizdə eyni cavabı eşidirdik:

Burdayam… nə lazımdırsa edirik.

Bu cümlə bir raport deyildi, vicdanın səsi idi. Bəzən bir insanın taleyi məhz belə sakit cümlələrdən başlayır.

O gün anladım ki, polis forması təkcə səlahiyyət deyil, mərhəmət libasıdır. M.Gözəlovun orada etdikləri mənə kitabların öyrətmədiyi həqiqəti göstərdi ki, bəzən bir insanın vaxtında atdığı addım bütöv taleyi dəyişir.

O səhnəni seyr edərkən qəribə bir qürur duydum. Sanki qaranlıq küçənin ortasında kiçik bir işıq yandı, insanlıq işığı. Və başa düşdüm ki, nə yaxşı, ordan polis keçirdi…”.


Qeyd edək ki, Müşfiq I Qarabağ müharibəsinin ilk şəhidlərindən biri, iş otağında qətlə yetirilən Şuşa rayon İcra Hakimiyyətinin başçısı Mikayıl Gözəlovun yeganə oğludur. Atası qətlə yetiriləndə Müşfiqin 2 yaşı olub.

Xatırladaq ki, ötən il dekabrın 25-də Bakının mərkəzi küçələrindən birində yol nəqliyyat hadisəsi baş verib. Bu zaman piyada səkisində olan 10 yaşlı Sərxanın başına yol nişanı çırpılıb. O aldığı xəsarətlərdən uzun müddət müalicə aldıqdan donra evə buraxılıb.

Gülnaz Qənbərli
Azadmediatv.com