Xalqımızın taleyinə həm faciə, həm də qəhrəmanlıq nümunəsi kimi daxil olmuş 1990-cı ilin 20 yanvar faciəsindən 36 il keçir. Birbaşa sovet rəhbərliyinin himyədarlığı ilə törədilən bu qanlı faciə 20-ci əsr boyu xalqımıza qarşı yönəldilən düşünülmüş siyasətin növbəti təzahürü olmaqla azərbaycanlıların Ermənistan ərazisindəki əzəli torpaqlarından deportasiyası məqsədi daşıyrdı.Ölkəmizin bütün bölgələrində olduğu kimi 2026-cı il 20 yanvar tarixində laçınlıların müvəqqəti məskunlaşdıqları Ağcabədi rayonu Taxta Körpü qəsəbəsində Laçın Rayon İcra Hakimiyyətinin təşkilatçılığı ilə anım tədbiri keçirilmişdir. Laçın Rayon İcra Hakimiyyəti rəhbərliyinin, rayonun hüquq mühafizə orqanlarının rəhbərlərinin, şəhid ailəsi üzvlərinin, müharibə veteranlarının və çoxsaylı rayon ictimaiyyəti nümayəndələrinin iştirakı ilə Taxta Körpü qəsəbəsinə ucaldılmış “Şəhidlərin Xatirə Kompleksi” qarşısında keçirilən tədbirdə şəhidlərin əziz xatirəsi ehtiramla yad edilərək ruhlarına dualar oxunmuş, əbədi məşəlin alovlandığı Xatirə kompleksi ziyarət olunaraq abidə önünə tər qərənfillər düzülmüşdür.

Qeyd edilməlidir ki, XX əsrin 90-cı illərinin əvvəllərində milli azadlığı, suveren hüquqları və dövlət müstəqilliyi uğrunda mübarizəyə başlayan Azərbaycan xalqına qarşı o zamankı SSRİ rəhbərliyi tərəfindən müasir silahlar və texnikalar ilə təchiz olunmuş müxtəlif qoşun hissələri yeridildi. 1990-cı il yanvarın 19-dan 20-ə keçən gecə Azərbaycanda SSRİ Müdafiə Nazirliyi, DİN xüsusi təyinatlıları və SSRİ DTK-nın təxribat qrupları tərəfindən günahsız insanların gülləbaran edilməsi əməliyyatına başladı. Mixail Qorbaçov başda olmaqla sovet imperiyasının rəhbərliyi Bakıda "erməni kartından" məharətlə istifadə edərək, Bakıya qoşun yeridilməsinin əsas məqsədi guya hərbi qulluqçuların ailələrini qorumaq, "millətçi ektremistlər" tərəfindən hakimiyyətin ələ keçirilməsinin qarşısını almaqdan ibarət idi. Həyata keçirilən qətliam nəticəsində respublikada 147 nəfər öldürülmüş, 744 nəfər yaralanmış, 841 nəfər qanunsuz həbs olunmuş, 200 ev və mənzil, 80 avtomaşın, o cümlədən təcili yardım maşınları, dövlət əmlakı və şəxsi əmlak məhv edilmişdir. Dövlət, ictimai və şəxsi əmlaka həmin dövrün qiymətləri ilə 5.637.286 rubl miqdarında maddi ziyan vurulmuşdur. 20 Yanvar hadisələrindən sonra xalq daha bir gerçəkliyin şahidi oldu. Xalqın mübarizəsini, tökülən qanı siyasi niyyətləri üçün alətə çevirən Azərbaycan Xalq Cəbhəsinin başında duranların iç üzü açılmağa başlamışdı. Belə ki, 20 Yanvar hadisələrinə siyasi qiymət verilməsi tələbi ilə dəfələrlə çıxış edən Azərbaycan Xalq Cəbhəsi hakimiyyətə gəldikdən sonra bu mövzunu unutdu. Onlar hakimiyyətdə olduğu dövrdə faciəyə siyasi qiymət vermək üçün öz imkanlarından istifadə etmədilər.

Nəhayət hadisəyə ilk siyasi-hüquqi qiymət Ümummilli Lider Heydər Əliyev tərəfindən verildi. Faciənin ertəsi günü - yanvarın 21-də Heydər Əliyev Azərbaycanın Moskvadakı daimi nümayəndəliyinə gələrək xalqla birgə olduğunu bildirdi, 20 Yanvar faciəsinə siyasi qiymət verdi, onun hüquqa, demokratiyaya, humanizmə zidd olduğunu, mərkəzin və ozamankı respublika rəhbərlərinin xəyanəti üzündən baş vermiş siyasi səhv olduğunu bəyan etdi.

Əminliklə deyə bilərik ki, ölkəmizin müstəqilliyi və ərazi bütövlüyü uğrunda mübarizədə canlarından keçmiş bütün şəhidlərin ruhları bu gün şaddır. Müzəffər Ali Baş Komandan cənab İlham Əliyevin rəhbərliyi 2020-ci ildə Azərbaycan Ordusu xalqımızın 30 illik həsrətinə son qoydu, torpaqlarımızı erməni işğalından azad etdi. 2023-cü ilin sentyabrında həyata keçirilən uğurlu antiterror tədbirləri nəticəsində isə suverenliyimiz tam bərpa olundu. İndi bütün ərazilərimizdə Azərbaycanın üçrəngli Bayrağı dalğalanır. İşğaldan azad edilmiş ərazilərdə genişmiqyaslı quruculuq işləri sürətlə davam edir, Böyük Qayıdış Proqramı uğurla icra olunur.

Məğlub milləti qalib xalq etmiş yenilməz sərkərdə, dünyanı heyrətləndirməyi bacaran dövlət xadimi, Ulu öndər Heydər Əliyevin layiqli davamçısı, Möhtərəm Prezident, Ali Baş Komandan cənab İlham Əliyevin qətiyyəti, Silahlı Qüvvələrimizin gücü ilə 30 ilə yaxın düşmən tapdağı altında qalan müqəddəs torpaqlarımızın 44 günlük Vətən müharibəsi zamanı işğaldan azad olunması, eləcədə 2-ci Qarabağ müharibəsinin yekunu olaraq 2023-cü ilin 19-20 sentyabr tarixində bir gündən az müddətə ordumuz tərəfindən həyata keçirilən lokal xarakterli antiterror əməliyyatı ilə dövlət suverenliyimizin təmin edilməsilə Vətən yolunda canından keçmiş bütün şəhidlərimizin qisası alınaraq, ruhları rahatlıq tapmışdır. 20 Yanvar faciəsi, eyni zamanda həm ümumxalq faciəsi, həm də müstəqillik, istiqlal uğrunda xalqımızın apardığı milli azadlıq hərəkatının zirvəsi kimi Azərbaycan tarixinə əbədi həkk olunmuşdur. Hər il olduğu kimi bu ildə faciənin 36-cı il dönümündə bütün şəhidlərin əziz xatirəsi xalqımız tərəfindən ehtiramla yad olunur, ruhlarına dualar oxunur. Ölkəmizin ərazi bütövlüyü, xalqımızın azadlığı, dövlətimizin müstəqilliyi yolunda canlarını qurban verən həmvətənlərimiz hər zaman hörmətlə yad olunacaqdır.