Qışın oğlan çağında kommunal xaos: Nəsimi rayonu Cavadxan 48-də qaz, su və işıq kəsildi.

Bakı şəhəri, Nəsimi rayonu Cavadxan küçəsi 48 ünvanında yaşayan sakinlər qışın ən soyuq günlərində ciddi kommunal böhranla üz-üzə qalıb. Məlumata görə, Azəriqaz, Azərsu və Azərişıq tərəfindən eyni vaxtda qaz, su və elektrik enerjisinin kəsilməsi əhalinin haqlı narazılığına səbəb olub.
Sakinlər bildirir ki, havaların kəskin soyuduğu bir dövrdə bu cür kəsintilər insanların normal yaşayışını iflic vəziyyətinə salıb. Xüsusilə azyaşlı uşaqların, yaşlıların və xəstələrin olduğu binalarda vəziyyət daha ağırdır. İnsanlar evlərini isidə, yemək bişirə, gündəlik məişət tələbatlarını ödəyə bilmirlər.
Məsələnin ən narahatedici tərəfi isə odur ki, sakinlərin aidiyyəti qurumlara etdiyi müraciətlər nəticəsiz qalır. Kəsintilərin səbəbi ilə bağlı dəqiq məlumat verilmir, problemin nə vaxt aradan qaldırılacağı isə açıqlanmır. Paytaxtın mərkəzi rayonlarından biri olan Nəsimidə bu mənzərə kommunal təsərrüfatın real vəziyyətini açıq şəkildə ortaya qoyur.
Sual yaranır:
Qışın oğlan çağında vətəndaşı qazsız, susuz və işıqsız qoyan bu qərarların məsuliyyəti kimə aiddir?
Kommunal xidmətlər abonent qarşısında öhdəliklərini niyə yerinə yetirmir?
Sakinlər məsələ ilə bağlı təcili tədbirlərin görülməsini, kəsintilərin dərhal aradan qaldırılmasını və rəsmi qurumlar tərəfindən ictimaiyyətə aydın izahat verilməsini tələb edir.

Qarşı tərəfin mövqeyini dərc etməyə hazırıq.