Söz azadlığına zərbə: “Azərbaycan” nəşriyyatında redaksiyalar qeyri-müəyyən taleyə məhkum edilir.

“Azərbaycan” nəşriyyatında təmir adı altında redaksiyalar fakt qarşısında qoyulur
“Azərbaycan” nəşriyyatında yerləşən və uzun illərdir fəaliyyət göstərən bir sıra redaksiyalar təmir aparılacağı adı ilə binanı tərk etməyə məcbur edilir. Məsələ ilə bağlı redaksiyalara alternativ ofis təqdim olunmaması və geri dönüşlə bağlı heç bir rəsmi zəmanətin verilməməsi media cameəsində ciddi narahatlıq doğurub.
Məlumata görə, aylıq yüksək məbləğdə icarə haqqı ödəyən redaksiyalar hazırda çıxılmaz vəziyyətlə üz-üzə qalıb. Paytaxtda ofis icarə haqlarının kəskin bahalaşdığı bir vaxtda bu qərar jurnalistlərin fəaliyyətini ciddi şəkildə məhdudlaşdırır. Redaksiyalar nə hara köçəcəklərini, nə də fəaliyyətlərini necə davam etdirəcəklərini bilmirlər.
Jurnalistlər hesab edirlər ki, baş verənlər sadəcə texniki təmir məsələsi deyil. Alternativ şərait yaradılmadan atılan bu addımlar media qurumlarına qarşı biganə münasibətin göstəricisi kimi qiymətləndirilir. Bu isə söz və mətbuat azadlığı prinsipləri ilə ziddiyyət təşkil edir.
Xüsusilə narahatlıq doğuran məqamlardan biri də odur ki, nəşriyyat rəhbərliyi tərəfindən vəziyyətlə bağlı aydın, ictimaiyyətə açıq və əsaslandırılmış mövqe ortaya qoyulmayıb. Bu isə şübhələri daha da artırır və suallar doğurur: təmir bitdikdən sonra redaksiyalar əvvəlki ofislərinə qayıda biləcəklərmi, yoxsa bu, daimi çıxarılmanın başlanğıcıdır?
Məsələ ilə bağlı narazı jurnalistlər 02 fevral 2026-cı il tarixində, saat 11:00-da “Azərbaycan” nəşriyyatı qarşısında etiraz aksiyası keçirmək barədə qərar veriblər. Etirazçılar bildirirlər ki, məqsədləri qarşıdurma yox, hüquqlarının təmin olunması və ədalətli qərarın qəbul edilməsidir.
Redaksiyalar tərəfindən irəli sürülən əsas tələblər bunlardır:
nəşriyyatdan çıxarılan media qurumlarının alternativ ofislərlə təmin olunması;
əsaslı təmir başa çatdıqdan sonra redaksiyaların əvvəlki ofislərinə geri qaytarılmasına yazılı zəmanət verilməsi;
müvəqqəti köçürülmə üçün müəyyən edilmiş son tarixlərin uzadılması.
Media nümayəndələri hesab edirlər ki, bu tələblər yerinə yetirilməzsə, məsələ daha geniş ictimai müzakirəyə çıxarılacaq. Çünki söhbət təkcə bir neçə redaksiyanın taleyindən yox, ölkədə media mühitinə münasibətdən gedir.