“İçərişəhər” Dövlət Tarix-Memarlıq Qoruğu İdarəsinin təşkilatçılığı ilə şəhid Mühüd Orucovun anım mərasiminə həsr olunmuş “Cəsarətin adı - Mühüd Orucov” adlı tədbir keçirilib.

Xəbər verilir ki, tədbirin açılışında şəhidin əziz xatirəsi 1 dəqiqəlik sükutla yad edilib, daha sonra Azərbaycan Respublikasının Dövlət Himni səsləndirilib. Ardınca Mühüd Orucova həsr olunmuş videoçarx nümayiş etdirilib.

Tədbirdə şəhidin ailə üzvləri, Milli Məclisin deputatları Elçin Mirzəbəyli və Vüqar Rəhimzadə, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, eləcə də şəhidin döyüş yoldaşları və digər qonaqlar iştirak ediblər.

Açılış nitqi ilə çıxış edən “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud Aprel döyüşlərində göstərilən qəhrəmanlığı xatırladaraq Mühüd Orucovun igidliyindən və onun xatirəsinin daim yaşayacağından bəhs edib.

Deputat Elçin Mirzəbəyli çıxışında şəhidin ailəsinə başsağlığı verərək bildirib ki, Mühüd Orucovun, eləcə də bütün şəhidlərimizin xatirəsi xalqımız üçün əzizdir və hər zaman böyük ehtiramla yad olunur.

Vüqar Rəhimzadə isə Aprel döyüşlərinin əhəmiyyətindən bəhs edərək bu döyüşlərin Azərbaycan Ordusunun gücünü bir daha nümayiş etdirdiyini qeyd edib.

Şəhidin atası Qurban Orucov oğlunun qorxmaz, igid və ağıllı övlad olduğunu bildirib.
Ətraflı

“Bizim layiqli ordumuza ilham və güc verənlərdən biri oldu. Təhsil seçimində ona sərbəstlik verdik, o da hərbi yolu seçdi. Daha sonra xidmətə başladı. Həmişə deyirdi ki, mən düşmən qarşısında baş əyməyəcəyəm, onlara qalib gələcəyəm. Elə də etdi. Aprel döyüşləri ilə zəfər yolunun başlanğıcını qoydu”.

Şəhidin həyat yoldaşı Qumru Orucova isə bildirib ki, Mühüd Orucov təkcə peşəkar zabit deyil, həm də qayğıkeş ata və həyat yoldaşı olub:

“Mühüd bizim qəlbimizdə daim yaşayır, əbədi bizimlədir. Biz də çalışırıq ki, hər addımımızda onun övladlarını adına layiq şəkildə böyüdək. O, həm mənim, həm də övladlarının, bütün ailəmizin qürurudur, fəxridir. O, bizim and yerimizdir, başımızın tacıdır. Onunla hər zaman qürur duyuruq”.

Şəhidin döyüş yoldaşı Vətən Müharibəsi Qəhrəmanı Zaur Hüseynov çıxışında Mühüd Orucovu peşəkar, tələbkar və ədalətli komandir kimi xarakterizə edib:

“Mühüdlə ilk dəfə xidmət etdiyim bölmədə tanış oldum. Bu, sadəcə iki hərbçinin tanışlığı deyildi, peşəkar zabit kimi formalaşdığımız bir başlanğıc idi. O, təkcə peşəkar hərbçi deyildi, həm də silahdaşlarını arxasınca aparmağı bacaran əsl komandir idi. Tələbkar olsa da, heç vaxt ədalətdən kənar davranmazdı. Təlimlərin daha keyfiyyətli və dinamik keçməsi üçün daim yeni ideyalar irəli sürürdü. Nə deyirdisə, ilk növbədə özü nümunə göstərirdi. Boş vaxtlarında idmanla məşğul olur, ətrafındakıları da buna təşviq edirdi. Çünki yaxşı bilirdi ki, fiziki hazırlıq güclü olduqda döyüş meydanında iradə də möhkəm olur. Mühüd Orucov Xüsusi Təyinatlı Qüvvələrin ilk döyüş tapşırıqlarını yerinə yetirən nadir zabitlərdən biri idi. O, döyüşlərdə özünü yox, şəxsi heyəti və tapşırığın icrasını düşünürdü. Bu xüsusiyyətləri onu peşəkarlığı, şəxsi nüfuzu və dönməz iradəsi ilə fərqləndirirdi. Böyüklə böyük, kiçiklə kiçik, dosta dost, düşmənə düşmən idi”.

Tədbirin davamında şəhidin xatirəsinə həsr olunmuş bədii qiraət və musiqi nömrələri təqdim edilib.

Sonda qonaqlar Mühüd Orucovun şəxsi fotolarından ibarət sərgi ilə tanış olublar.