26 iyun - Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü çərçivəsində Laçın rayonu üzrə silsilə tədbirlər keçirilmişdir.
Yaşadığımız dövrün ən aktual, və olduqca ağrılı problemi olan narkomaniya və onun fəsadlarına qarşı mübarizə ilə bağlı əhali, xüsusən də gənc nəsil arasında maarifləndirmə və təbliğat işlərinin aparılması ölkəmizin hər yerində olduğu kimi Laçın rayonunda da mütəmadi hal almışdır.
26 iyun - Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü çərçivəsində Laçın rayonu üzrə silsilə tədbirlər keçirilmişdir. Narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizəyə həsr olunmuş həmin sisilə tədbirlərdə iştirak edən Laçın Rayon İcra Hakimiyyətinin, Laçın rayon Polis Şöbəsinin, Laçın rayonu üzrə Təhsil sektorunun, Laçın Rayon Mərkəzi Xəstəxanasının məsul əməkdaşları bu silsilə tədbirlər çərçivəsində rayonun təhsil müəssisələrində xüsusilə yeniyetmələrə bu dəhşətli bəlanın ağır və əzablı nəticələri barədə məlumat verərək, bu mövzuda geniş və əhatəli maarifləndirici söhbətlər aparmışlar.
Keçirilən tədbirlər zamanı Laçın Rayon İcra Hakimiyyətinin məsul əməkdaşları tərəfindən narkomaniya və onun fəsadlarına qarşı mübarizə ilə bağlı videoslaydlar hazırlanaraq məktəblilərin maarifləndirilməsi məqsədilə nümayiş olunmuşdur. Həmçinin, yeniyetmə məktəblilərə narkomaniyanın ağır fəsadlarını və ondan qorunmağın yollarını əks etdirən müxtəlif bukletlər və broşuralar paylanmışdır.
Tədbirlərdə qeyd edilmişdir ki, narkotik maddələrin gənc nəsil arasında yayılmasının qarşısını almaq məqsədi ilə dünyanın bir çox ölkələrində olduğu kimi, ölkəmizdə də bu sahədə qəbul edilmiş milli proqramlarda nəzərdə tutulan müddəalar uğurla yerinə yetirilir.
