Bu gün Milli Qəhrəman Rövşən Əliyevin doğum günüdür.



xebernur.com xəbər verir ki, Rövşən Nəriman oğlu Əliyev 30 avqust 1972-ci ildə Bakı şəhərində dünyaya gəlib. Əslən Göyçə mahalının Basarkeçər rayonunun Yarpızlı kəndindən olub.



1989-cu ildə Xətai rayonundakı 254 saylı orta məktəbi bitirdikdən sonra Azərbaycan Dövlət Politexnik İnstitutunun maşınqayırma fakültəsinə daxil olub. 1991-ci ilin mayında könüllü olaraq orduya yazılıb.



Ağdamda yaradılmış milli müdafiə taborunda döyüş meydanına atılıb. O, döyüşlərdə Sırxavənd, Qazançı kəndlərinin düşməndən azad edilməsində yaxından iştirak edib. Verilən bütün əmr və tapşırıqları layiqincə yerinə yetirən R.Əliyev 1992-ci ilin 14 iyun tarixində Xocalı rayonunun Dəhrəz kəndində gedən döyüşlərdə qəhrəmancasına şəhid olub.


Azərbaycan Prezidentinin 7 dekabr 1992-ci il tarixli fərmanı ilə Əliyev Rövşən Nəriman oğlu ölümündən sonra "Azərbaycanın Milli Qəhrəmanı" adına layiq görülüb.


Bakı şəhərinin Şəhidlər xiyabanında dəfn edilib. Vaxtilə təhsil aldığı 254 saylı orta məktəbə və Bakı şəhərindəki küçələrdən birinə qəhrəmanın adı verilib.