Azərbaycanda idmanın inkişafı istiqamətində həyata keçirilən uğurlu siyasət və idman sahəsinə göstərilən yüksək dövlət qayğısı bu gün ölkəmizi dünyanın idman mərkəzlərindən birinə çevirib. Məhz belə möhtəşəm tədbirlərdən biri də Milli Qəhrəman Fred Asifin əziz xatirəsinə həsr olunmuş Kikboksinq üzrə Açıq Turnirdir. 30–31 may tarixlərində Hövsan Olimpiya İdman Kompleksində keçiriləcək yarış təkcə idman tədbiri deyil, eyni zamanda vətənpərvərlik, sağlam gənclik və milli dəyərlərin təbliği missiyasını daşıyan mühüm layihədir.
Turnirin əsas məqsədi sağlam həyat tərzinin təbliği, gənclərin idmana cəlb olunması, narkomaniya və uşaq cinayətkarlığına qarşı mübarizəyə dəstək verməkdir. Tədbirin devizi olan "Kikboksinq narkomaniyaya və uşaq cinayətkarlığına qarşı" şüarı cəmiyyət üçün mühüm mesajdır. Çünki müasir dövrdə gənclərin zərərli vərdişlərdən uzaqlaşdırılması və onların sağlam istiqamətə yönləndirilməsi hər bir dövlət üçün prioritet məsələlərdən biridir.
Kikboksinq Azərbaycanda sürətlə inkişaf edən idman növlərindən biridir. Bu inkişafın arxasında isə Azərbaycan Kikboksinq Federasiyasının məqsədyönlü fəaliyyəti, düzgün idarəetmə prinsipləri və peşəkar rəhbərliyin böyük əməyi dayanır. Federasiya rəhbərliyinin həyata keçirdiyi layihələr, bölgələrdə idmanın kütləviliyinin artırılması, gənc idmançıların yetişdirilməsi istiqamətində görülən işlər bu sahədə ciddi uğurların əldə olunmasına səbəb olub.
Bu gün Azərbaycan Kikboksinq Federasiyası yüzlərlə deyil, minlərlə gəncin həyat yolunun düzgün formalaşmasına töhfə verir. İdman zallarında məşq edən yeniyetmələr və gənclər yalnız fiziki hazırlıq keçmir, eyni zamanda intizam, vətən sevgisi, dözümlülük və mübarizlik ruhu qazanırlar. Məhz buna görə federasiyanın fəaliyyəti təkcə idman nəticələri ilə deyil, həm də sağlam cəmiyyətin formalaşdırılması baxımından yüksək qiymətləndirilir.
Azərbaycana səfər edən müxtəlif beynəlxalq kikboksinq assosiasiyalarının nümayəndələri və rəhbər şəxslər dəfələrlə ölkəmiz haqqında yüksək fikirlər səsləndiriblər. Onların fikrincə, Azərbaycan artıq dünyaya yalnız enerji və iqtisadi inkişaf modeli ilə deyil, həm də güclü idman potensialı ilə tanınır. Xarici qonaqlar çıxışlarında vurğulayıblar:
"Azərbaycan idmançılar ölkəsidir. Burada idmana olan dövlət qayğısı, yaradılan şərait və yetişən idmançılar nümunəvi model hesab oluna bilər."
Bu fikirlər Azərbaycanın beynəlxalq idman arenasında qazandığı nüfuzun göstəricisidir.
Ümummilli Lider Heydər Əliyev hər zaman idmanın cəmiyyət üçün vacibliyini xüsusi vurğulayırdı. Onun məşhur fikirlərindən biri bu gün də öz aktuallığını qoruyur:
"İdman gəncləri sağlam həyata aparan ən düzgün yoldur."
Məhz Ulu Öndərin müəyyən etdiyi idman strategiyası bu gün uğurla davam etdirilir.
Azərbaycan Respublikasının Prezidenti, Ali Baş Komandan İlham Əliyevin rəhbərliyi altında idmanın inkişafı yeni mərhələyə qədəm qoyub. Ölkənin müxtəlif bölgələrində müasir idman kompleksləri inşa olunub, beynəlxalq yarışlara ev sahibliyi edilib, idmançılar üçün yüksək səviyyəli şərait yaradılıb. Dövlət başçısının idmana diqqət və qayğısı nəticəsində Azərbaycan beynəlxalq idman xəritəsində öz güclü mövqeyini möhkəmləndirib.
Milli Qəhrəman Fred Asifin xatirəsinə həsr olunan bu turnirin xüsusi mənəvi yükü var. Vətən uğrunda canından keçmiş qəhrəmanların xatirəsinin daim uca tutulması milli-mənəvi dəyərlərimizin əsas hissəsidir. Gənc nəsil qəhrəmanlarımızı tanımalı, onların keçdiyi şərəfli həyat yolundan nümunə götürməlidir. Fred Asifin adının belə mötəbər idman tədbirində yaşadılması qəhrəmanlara verilən yüksək dəyərin və ehtiramın nümunəsidir.
Bu yarış idman meydanında keçirilən adi turnir deyil. Bu, sağlam gələcəyin, güclü Azərbaycan gəncliyinin, vətənpərvərlik ruhunun və milli dəyərlərin təntənəsidir. Azərbaycanın idman gələcəyini formalaşdıran belə tədbirlər ölkəmizin gücünü və birliyini bir daha nümayiş etdirir.

Müəllif : Omar Borcəli