2026-cı il dövlət büdcəsi Milli Məclisin komitələrində müzakirə olunur və bu həftədən plenar iclas səviyyəsində müzakirələr başlayacaq.

Lakin buna baxmayaraq, büdcə zərfi tam şəkildə Milli Məclisin media orqanında yayımlanmaması bir çoxları üçün qeyri-müəyyənlik yaradıb.

İqtisadçı Natiq Cəfərli bildirib ki, qanun layihəsi birmənalı şəkildə açıqlanmalıdır:

“Büdcə layihəsi açıqlanmalıdır. Qanun da, ictimai müzakirələrin məntiqi də bunu tələb edir. Büdcənin tam mətninin açıqlanması mütləqdir. Bunun açıqlanmaması büdcə ilə bağlı müəyyən dairələrdə fikir ayrılıqları olduğunu deməyə əsas verir. Ola bilər ki, haradasa xərclərin artırılması və ya azaldılması ilə bağlı ortaq məxrəcə gələ bilməyiblər deyə büdcə layihəsinin tam mətnini açıqlamırlar. Lakin bu, məntiqli deyil. Obrazlı dillə desək, büdcə bir ölkənin pasportudur. O pasportun vətəndaşlar tərəfindən görülməsi vacibdir”.

N. Cəfərli qeyd edib ki, hamımızın büdcənin formalaşmasında payı var:

“Biz vergi ödəyicisiyik. Ona görə də büdcənin tam mətni, xərclər və gəlirlərlə bağlı istiqamətlər barədə vətəndaşların məlumat almaq haqqı var”.

İqtisadçı Eldəniz Əmirov da bu məsələdə birmənalı düşündüyünü, qanun layihələrinin, xüsusilə də iqtisadiyyatla bağlı layihələrin ictimaiyyət üçün açıq olmalı olduğunu vurğulayıb.