Sumqayıt şəhərini Abşeron rayonunun Saray qəsəbəsi ilə birləşdirən Məhəmməd Əsədov küçəsində inşa edilən yeni körpünün tikintisi son mərhələyə çatıb. Azərbaycan Respublikası Prezidentinin müvafiq Sərəncamına əsasən aparılan işlər sürətlə davam etdirilir və yaxın zamanda körpünün tam istifadəyə verilməsi planlaşdırılır.

Üç aşırımdan ibarət olan yeni körpünün uzunluğu 104 metr, ümumi eni isə 21,6 metr təşkil edir. Dörd hərəkət zolaqlı olmaqla inşa edilən körpünün hər iki tərəfində piyadaların rahat hərəkəti üçün 2 metr enində səkilər də nəzərdə tutulub. Tikinti işlərinin vaxtında tamamlanması üçün əraziyə kifayət qədər canlı qüvvə və texnika cəlb olunub.

Qeyd edək ki, Sumqayıt-Saray yolunda yerləşən və 1970-ci illərdə inşa edilən əvvəlki körpü istismara yararsız vəziyyətdə olduğu üçün sökülüb və yerində müasir tələblərə cavab verən yeni körpü inşa edilir.

Sumqayıt şəhər İcra Hakimiyyətinin başçısı Zakir Fərəcov tikinti ərazisinə baxış keçirib, görülən işlərlə tanış olub. Məlumata görə, körpü istifadəyə verildikdən sonra yolda genişləndirmə işləri aparılacaq, piyadaların və nəqliyyatın hərəkətinin rahatlığını təmin etmək məqsədilə əvvəlki yol infrastrukturu körpüyə uyğunlaşdırılacaq. Bununla bağlı qərara alınıb ki, yaxın günlərdə Məhəmməd Əsədov küçəsinin genişləndirilməsi ilə bağlı yeni layihə hazırlansın və icrasına başlanılsın.