2025-ci il 9 iyul tarixdə Laçın Rayon İcra Hakimiyyəti başçısı aparatında cari məsələlərə və qarşıda duran vəzifələrə həsr edilmiş müşavirə keçirilmişdir. Müşavirədə Laçın Rayon İcra Hakimiyyəti başçısı aparatının məsul əməkdaşları, rayonun idarə, müəssisə, təşkilat rəhbərləri, müvafiq inzibati ərazi dairələri üzrə nümayəndəliklərin işçiləri iştirak etmişlər.

Bildirilmişdir ki, Azərbaycan Respublikası Prezidentinin 2018-ci il 14 fevral tarixli 3672 nömrəli Sərəncamı ilə "2018-2025-ci illərdə Azərbaycan Respublikasında rəsmi statistikanın inkişafına dair Dövlət Proqramı"ı təsdiq edilmişdir. Həmin Proqramın 5.1.2.9-cu yarımbəndində 2025-ci ildə Azərbaycan Respublikasında kənd təsərrüfatının növbəti siyahıyaalınmasının keçirilməsi ilə bağlı tədbir öz əksini tapır. Bu Sərəncamın icrasını təmin etmək məqsədilə "2025-ci ildə Azərbaycan Respublikasında kənd təsərrüfatının siyahıyaalınmasına hazırlıq və onun keçirilməsi haqqında" Azərbaycan Respublikası Nazirlər Kabinetinin 2023-cü il 4 oktyabr tarixli, 357 nömrəli Qərarı ilə ölkə üçün müstəsna əhəmiyyətə malik olan bu tədbirin 2025-ci ilin 15 iyul-15 avqust tarixlərində keçirilməsi nəzərdə tutulmuşdur.

Tədbirin mütəşəkkil keçirilməsini təmin etmək məqsədilə Nazirlər Kabinetinin sözügedən qərarı ilə Tədbirlər Planı təsdiq edilmiş, mərkəzi və yerli icra hakimiyyəti orqanlarına, digər aidiyyəti təşkilatlara müvafiq tapşırıqlar verilmiş və İstiqamətləndirici Komitə yaradılaraq tərkibi təsdiq edilmişdir. Laçın Rayon İcra Hakimiyyətinin başçısının 2024-cü il 20 dekabr tarixli 5-64/3-4-223/2024 nömrəli Sərəncamı ilə Laçın Rayonu İcra Hakimiyyəti Başçısı yanında Laçın Rayon İcra Hakimiyyəti başçısının birinci müavininin sədrliyi ilə “Kənd təsərrüfatının siyahıyaalınmasına yardım Komissiyası” yaradılmışdır. Aqrar bölmədə həyata keçirilən islahatların informasiya təminatının zənginləşdirilməsi məqsədilə kənd təsərrüfatında baş verən proseslər haqqında aktual məlumatların əldə edilməsini təmin etmək üçün Ümumdünya kənd təsərrüfatı siyahıyaalınması çərçivəsində Azərbaycanda da bu mühüm tədbirin həyata keçirilməsinə zərurət yaranmışdır.

Laçın Rayon İcra Hakimiyyəti başçısının yanında “Kənd təsərrüfatının siyahıyaalınmasına yardım Komissiyası”nın sədri Tofiq Mirzəyevin 2025-ci ilin 15 iyul-15 avqust tarixlərində keçirilməsi nəzərdə tutulmuş kənd təsərrüfatının siyahıyaalınması ilə bağlı geniş məlumatından sonra Laçın Rayon Statistika İdarəsinin rəisi Alik Cəfərov bununla əlaqədar ətraflı şəkildə müvafiq məlumatları tədbir iştirakçılarının diqqətinə çatdırmışdır.
Müşavirədə mövcud vəziyyət ətraflı müzakirə olunaraq qarşıda duran vəzifələrlərin həyata keçirilməsi üçün müvafiq qərar qəbul edilmiş, qərar üzrə müəyyən edilmiş tapşırıqların icrası nəzarətə götürülmüşdür.