8 noyabr — Zəfər Günü münasibətilə Şərqi Zəngəzur Regional Mədəniyyət İdarəsinə tabeli Laçın rayon Aşağı Fərəcan kənd klubunda Laçın rayon Pircahan, Alıqulu, Ağ oğlan, Mığıdərə, Malıbəy, Yuxarı Fərəcan, Şəlvə, Kamallı, Zabux, Bozlu və Xaçınyalı kənd klub və mədəniyyət evlərinin təşkilatçılığı ilə bayram tədbiri keçirilib.
Tədbir Azərbaycan Respublikasının ərazi bütövlüyü uğrunda şəhid olan qəhrəman Vətən övladlarının xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Aşağı Fərəcan kənd klubunun müdiri Solmaz Nuriyeva tədbiri açıq elan edib və Zəfər Gününün tarixi əhəmiyyətindən, xalqımızın birliyi və Ordumuzun qəhrəmanlığından danışıb.
Tədbirdə Pircahan, Alıqulu, Ağ oğlan, Mığıdərə, Malıbəy, Yuxarı Fərəcan, Şəlvə, Kamallı, Zabux, Bozlu və Xaçınyalı kənd klub və mədəniyyət evlərinin əməkdaşları, həmçinin Laçın Rayon İcra Hakimiyyətinin Aşağı Fərəcan və Pircahan kənd İcra nümayəndəliklərinin əməkdaşları iştirak ediblər.
Tədbir zamanı İcra nümayəndəliklərinin əməkdaşları çıxış edərək xalqımızın qazandığı tarixi Zəfərin əhəmiyyətindən, Müzəffər Ali Baş Komandanın rəhbərliyi ilə Ordumuzun göstərdiyi qəhrəmanlıqdan və bu qələbənin ölkəmizin gələcəyi üçün böyük mənəvi dəyər daşıdığından bəhs ediblər.
Tədbir bədii hissə ilə davam edib. Mədəniyyət evləri və klubların fəalları tərəfindən Zəfər Gününə həsr olunan ədəbi-bədii kompozisiyalar səsləndirilib. Sonda tədbir zamanı çıxış edən fəallar fəxri fərmanla təltif olunublar.