74 yaşlı məcburi köçkün Səyalı Rəhimovadan Prezidentə, Ağdam İcra Hakimiyyətinə və Qaçqınkom-a müraciət: “Ata yurduma qayıtmaq üçün mənzil istəyirəm”

Ağdam rayonundan olan 74 yaşlı məcburi köçkün Səyalı Məhərrəm qızı Rəhimova Prezident İlham Əliyevə, Ağdam Rayon İcra Hakimiyyətinə və Qaçqınların və Məcburi Köçkünlərin İşləri üzrə Dövlət Komitəsinə müraciət edərək doğma yurduna qayıtması üçün mənzil ilə təmin edilməsinə köməklik göstərilməsini xahiş edib.

Səyalı Rəhimovanın həyat yoldaşı Azərbaycanın ilk milli ordusuna könüllü qoşulan və baş leytenant kimi ən ağır döyüş bölgələrində xidmət edən hərbçilərdən biri olub. O, müharibənin gərgin illərində sivyaz rəisi kimi həm cəbhə xəttində, həm də rabitənin təmin olunmasında mühüm rol oynayıb. Uzun müddət cəbhə şəraitində çalışması nəticəsində ürək xəstəliyi inkişaf edib və 1997-ci ildə dünyasını dəyişib.

Səyalı xanım həmin dövrdə tibb işçisi kimi yaralı əsgərlərə könüllü yardım göstərdiyini bildirir.

Hazırda 74 yaşında olan məcburi köçkün Ağdamdan uzaqda, başqa bir rayon ərazisində tək yaşayır. Onun yaxın qohumları isə Ağdam rayonunun İmamqulubəyli qəsəbəsində məskunlaşıb. Yaşlı qadın tənha yaşamağın həm fiziki, həm də mənəvi cəhətdən getdikcə çətinləşdiyini qeyd edir.

Müraciətində o bildirir:

“İllərdir ata yurduma qayıtmaq arzusu ilə yaşayır və tək yaşamaqdan çox əziyyət çəkirəm. Xahiş edirəm, Ağdamda qohumlarımın yanında yaşaya bilməyim üçün mənzil ilə təmin olunmağıma köməklik göstərəsiniz.”

Səyalı Rəhimova ümid edir ki, müraciəti aidiyyəti qurumlar tərəfindən nəzərə alınacaq və məsələsinə baxılacaq.