Küçədə corab satan Vətən müharibəsi iştirakçısı Vüqar Hüseynovla bağlı müzakirələr davam edir Çingiz Qənizadədən açıqlama.

Son günlər “ Kanal 15” internet televiziyasında yayımlanan və Vətən müharibəsinin iştirakçısı, ailəsini dolandırmaq üçün küçədə corab satan Vüqar Hüseynov İlqar oğlu ilə bağlı hazırlanmış süjet ictimaiyyət arasında geniş müzakirələrə səbəb olub.

Sözügedən mövzu ilə bağlı keçmiş Milli Məclisin deputatı Çingiz Qənizadə sosial şəbəkə hesabında rəy bildirərək məsələyə münasibətini açıqlamışdı.

Məsələni aydınlaşdırmaq məqsədilə “ Kanal 15”in rəhbəri Nuranə Abdullayeva Çingiz Qənizadə ilə əlaqə saxlayaraq ona bir sıra suallar ünvanlayıb.
Keçmiş deputat verdiyi açıqlamada bildirib ki, o, bir vaxtlar Ağdaş rayonunda bir neçə dəfə Milli Məclisə keçirilən seçkilərdə iştirak etmişəm
və rayon sakinlərini yaxından tanıyır.
Onun sözlərinə görə, məqsədi heç vaxt kimisə hədəf almaq olmayıb:

Bəli, mən bir zamanlar Ağdaş rayonunun millət vəkili olmuşam və orada yaşayan sakinləri tanıyıram. Seçki dövrlərində müxtəlif təbəqələrdən olan insanlar mənə səs veriblər.
Buna görə hər birinə təşəkkür edirəm.
Mənim əsas məqsədim Vətən müharibəsi iştirakçısı Vüqar Hüseynova kömək etməkdir”, deyə Çingiz Qənizadə qeyd edib.

O bildirib ki, məsələ ilə bağlı bəzi vəzifəli şəxslərlə əlaqə saxlayıb və ona verilən məlumata görə, Vüqar Hüseynov Qarabağ əlili deyil, Vətən müharibəsi iştirakçısı veteran statusuna malikdir.
Eyni zamanda vurğulanıb ki, Ağdaş Rayon İcra Hakimiyyəti tərəfindən ona dəfələrlə müxtəlif formalarda köməklik göstərilib.

Çingiz Qənizadə açıqlamasında xüsusilə bir məqama diqqət çəkərək qeyd edib ki, Vüqar Hüseynovun küçədə medalları ilə çəkiliş aparması və bu zaman Prokurorluğun adının hallandırılması ona xoş təsir bağışlamayıb:
Burada Prokurorluğun hər hansı günahı yoxdur.
Mən bir çox Vətən müharibəsi iştirakçılarını tanıyıram ki, statuslarından sui-istifadə edərək insanları yorublar.
Mənim etirazım da məhz bu məqama idi”, deyə o bildirib.

Keçmiş deputat əlavə edib ki, “qazi” anlayışı ilə “veteran” anlayışı arasında hüquqi fərq var və bu terminlərin düzgün istifadə olunması vacibdir.
Onun sözlərinə görə, Vüqar Hüseynova köməklik göstərilib və məsələnin mahiyyəti yanlış təqdim olunub.

Çingiz Qənizadə eyni zamanda “Sosial Kanal 15”in rəhbəri Nuranə Abdullayevaya da müraciət edərək bildirib ki, belə süjetlərin yayımlanması sizin nüfuzunuza xələl gətirə bilər.
Bununla yanaşı, o, məsələnin rəsmi qurumlar tərəfindən araşdırılmasının daha doğru olacağını qeyd edib:

Nuranə xanım, siz Əmək və Əhalinin Sosial Müdafiəsi Nazirliyinə rəsmi müraciət edin və Vüqar Hüseynovla bağlı açıqlama alın.
Əgər burada hüquqi problem varsa, söz verirəm ki, Vüqar Hüseynova ödənişsiz vəkil tutaraq köməklik göstərəcəyəm. Mən də atayam və istəmərəm ki, bir ailə başçısı küçədə corab satmağa məcbur qalsın, deyə Çingiz Qənizadə bildirib.

Məsələ ilə bağlı Nuranə Abdullayeva da öz mövqeyini açıqlayaraq vurğulayıb ki, o, hər zaman qazilərin və Vətən müharibəsi iştirakçılarının yanında olub və bundan sonra da olacaq:

Mənim üçün qazilər və veteranlar bizim canlı şəhidlərimizdir. Onların dərdi mənim dərdimdir və bu mövzuda həmişə həssas olmuşam, deyə kanal rəhbəri qeyd edib.

Hazırda məsələ ictimai müzakirə mövzusu olaraq qalmaqda davam edir.