Bərdədə külli miqdarda dələduzluq iddiası: 152 min manatlıq etibar necə sui-istifadə olunub?

Vətəndaş Ülviyyə Əliyeva redaksiyamıza müraciət edərək Bərdə rayon sakini Abbasov Əli Ağa oğlu tərəfindən külli miqdarda pul vəsaitinin dələduzluq yolu ilə mənimsənildiyini iddia edib. Şikayətçinin sözlərinə görə, ona qarşı məqsədli şəkildə etibar yaradılıb, dini mənsubiyyət amilindən istifadə olunub və ardıcıl aldatma mexanizmi tətbiq edilib.

İddia edilir ki, tərəflər arasında ilkin tanışlıq Bərdə şəhərində mebel alışı zamanı baş verib. Daha sonra Abbasov Əli Ağa oğlu özünü və atasını — Abbasov Ağa Yaqub oğlunu Bərdə rayonunda tanınmış “seyid” ailəsinə mənsub şəxslər kimi təqdim edib. Şikayətçinin bildirdiyinə görə, bu məlumatlar onun etimadını qazanmaq məqsədi daşıyıb.
Araşdırmaya əsasən, Abbasov Əli Ağa oğlu Ülviyyə Əliyevaya guya heyvandarlıq sahəsində fəaliyyət göstərdiklərini, eyni zamanda EWA KIDS adlı mağazaya sahib olduqlarını bildirərək Bərdə rayonunda ferma açılması üçün “şəriklik” təklif edib. Məhz bu vədlərdən sonra Ülviyyə Əliyeva qarşı tərəfə ümumilikdə 152 000 manat məbləğində pul vəsaiti təqdim edib.
Şikayətçi bildirir ki, həmin məbləğin bir hissəsi bank kreditləri hesabına, digər hissəsi isə ona məxsus yaşayış evinin satılması yolu ilə əldə olunub. Pul vəsaiti təxminən 16 ay ərzində hissə-hissə Abbasov Əli Ağa oğluna verilib. Lakin bu müddət ərzində nə hüquqi şəriklik müqaviləsi bağlanıb, nə də rəsmi biznes fəaliyyəti ilə bağlı hər hansı sənəd təqdim olunub.
İddialara görə, vəsaitin geri qaytarılması və ya mənfəətin bölüşdürülməsi tələb edildikdə, Abbasov Əli Ağa oğlu heyvanların tələf olduğunu, təsərrüfatın zərərə düşdüyünü və pulun artıq mövcud olmadığını bildirib. Ülviyyə Əliyeva isə həmin dövrdə qarşı tərəfin qardaşının toy mərasiminin keçirildiyini, şəxsi yaşayış evinin əsaslı təmir olunduğunu əsas gətirərək, vəsaitin təyinatından kənar xərcləndiyini iddia edir.
Məsələ ilə bağlı şikayətçi ilkin olaraq Bərdə Rayon Polis Şöbəsinə müraciət edib. Onun sözlərinə görə, cinayət tərkibli əlamətlərə baxmayaraq, iş mülki mübahisə kimi qiymətləndirilib. Hazırda Ülviyyə Əliyeva prokurorluğa rəsmi şikayət ünvanlayaraq işin istintaq qaydasında araşdırılması və Bakı şəhərində baxılması üçün müraciət edib.
Araşdırma zamanı diqqət çəkən məqamlardan biri də odur ki, Abbasov Əli Ağa oğlunun atası — Ağa Yaqub oğlu tərəfindən şikayətçidən barışıq ərizəsi alınıb və dəymiş ziyanın tam ödəniləcəyi vəd edilib. Lakin Ülviyyə Əliyevanın bildirdiyinə görə, bu günədək 152 000 manatlıq zərərin yalnız 17 700 manatı geri qaytarılıb.
Hazırda iş üzrə:
pul vəsaitinin verilməsini təsdiqləyən sənədlərin,
tərəflər arasında aparılmış yazışmaların,
video və audio materialların
mövcud olduğu bildirilir.
Redaksiyamız növbəti materialda qeyd olunan sübutları ictimaiyyətə təqdim edəcək. Məsələ hüquqi və ictimai baxımdan diqqətdə saxlanılır.
Qarşı tərəfin mövqeyini dinləməyə və rəsmi açıqlamasını dərc etməyə hazırıq.