Şəhid ailəsinə qarşı laqeydlik iddiası: Kapital Bankdan açıqlama gözlənilir.

Şəhid atası Suləddin Yusifov həyat yoldaşı, şəhid anası Yusifova Bəturə Əskər qızının Kapital Bank tərəfindən heç bir rəsmi izahat verilmədən “qara siyahı”ya salındığını iddia edir.
Suləddin Yusifovun mətbuata verdiyi məlumata görə, bu qərar ailənin gündəlik maliyyə fəaliyyətini ciddi şəkildə məhdudlaşdırıb. Onun sözlərinə görə, bank kartlarından istifadə mümkün deyil, köçürmələr dayandırılıb və əsas bank xidmətləri bağlanıb. Bu vəziyyət onsuz da ağır şəraitdə yaşayan şəhid ailəsi üçün əlavə sosial və psixoloji çətinliklər yaradıb.
Şəhid atası bildirir ki, məsələ ilə bağlı Kapital Bankın müxtəlif filiallarına dəfələrlə müraciət ediblər. Lakin onlara konkret hüquqi əsaslandırılmış cavab təqdim olunmayıb. Bank əməkdaşlarının “sistem belə qərar verib” ifadəsi ilə kifayətləndiyi qeyd olunur.
Yaranmış vəziyyət bir sıra suallar doğurur. Qərarın hansı hüquqi əsaslarla və hansı meyarlar üzrə verildiyi açıqlanmır. Eyni zamanda, şəhid ailələri kimi sosial baxımdan həssas kateqoriyaya münasibətdə xüsusi yanaşmanın tətbiq olunmaması narazılıqla qarşılanır.
Suləddin Yusifovun iddiasına görə, Kapital Bank əvvəlcə şikayətə baxılacağı ilə bağlı vəd versə də, sonradan məsələ ilə bağlı geri dönüş olmayıb. O, bank tərəfindən edilən bu davranışı laqeydlik kimi qiymətləndirir.
Məsələ cəmiyyətdə də müzakirələrə səbəb olub. Qeyd olunur ki, şəhid ailələri dövlət və cəmiyyət tərəfindən xüsusi qorunmalı sosial qrup hesab olunur və onlara münasibətdə şəffaf, humanist yanaşma vacibdir.
İctimaiyyət Kapital Bankdan səsləndirilən iddialarla bağlı rəsmi və əsaslandırılmış açıqlama gözləyir. Aidiyyəti dövlət qurumlarının məsələyə müdaxilə edərək araşdırma aparması və şəhid ailəsinin hüquqlarının bərpa olunması zəruri hesab edilir.
Qarşı tərəfin mövqeyini dərc etməyə hazırıq.