Təhsil yox, özbaşınalıq: Sumqayıtdakı 3 saylı Peşə Təhsil Mərkəzində nə baş verir?

Sumqayıt şəhər Xidmət sahələri üzrə 3 saylı Peşə Təhsil Mərkəzi faktiki olaraq təhsil müəssisəsindən çox, nəzarətsiz və məsuliyyətsiz idarə olunan bir məkana çevrilib. Təhsil Nazirliyinin gözündən yayındığı deyilən bu mərkəbdə baş verənlər təhsilin adına açıq hörmətsizlikdir.
Müəssisənin direktoru Gülşən Ömərovanın məktəbdə demək olar ki, tapılmaması, standart iş qrafikinin olmaması artıq idarəetmənin iflas etdiyini açıq şəkildə göstərir. Direktorun yoxluğunda isə məktəbdə tam xaos hökm sürür.
Siniflər donur, vicdanlar isə susur
Sinif otaqları iç-içə, soyuq və tədris üçün yararsız vəziyyətdədir. Tələbələr şaxta şəraitində dərs keçməyə məcbur edilir. Kondisioner yoxdur, istilik sistemi işləmir amma təhsil haqqında hesabatlar kağız üzərində “əla”dır.
Qanunsuz pul yığımı açıq reket
Məktəbdə tələbələrdən qanunsuz şəkildə pul yığıldığı, oxuyanla oxumayanın yalnız pul verdiyinə görə eyni qiymət aldığı iddia olunur. Bu artıq təkcə təhsil pozuntusu deyil, korrupsiya əlamətidir.
Təqaüd alver predmetinə çevrilib
Daha biabırçı məqam isə təqaüd pulu qarşılığında tələbələrin aylığa buraxılmasıdır. Dövlətin gənclər üçün ayırdığı vəsait burada şəxsi maraqlara qurban verilir.
Forma pulu yığılıb, forma yoxdur
Tələbələrdən məktəbli forması üçün pul yığılsa da, 5 aydır formalar paylanmır. Nə forma var, nə də izah. Pulun hara getdiyi isə cavabsız sual olaraq qalır.
Direktor müavini məktəbi şəxsi mülkünə çevirib
Şikayətlərə görə, direktor müavini Xuraman müəllimə məktəbdə “at oynadır”, tələbələrə qarşı kobud davranır, nizam-intizam isə tamamilə formal xarakter daşıyır.
Davamiyyət kağız üzərində, reallıqda isə yox
Davamiyyətə qətiyyən əməl edilmir. Məktəbə gəlməyən tələbə də gələnlə eyni qiyməti alır yetər ki, pul ödənsin.
Təhsil Nazirliyi hara baxır?
Bu qədər fakt və iddialar fonunda sual açıq qalır:
Təhsil Nazirliyi Sumqayıtdakı bu peşə təhsil mərkəzindən xəbərdardırmı, yoxsa bilərəkdən susur?
Cəmiyyət cavab gözləyir.
Bu özbaşınalığa nə vaxt son qoyulacaq?


Yazıda səsləndirilən iddialarla bağlı qarşı tərəfin də mövqeyini öyrənməyə hazırıq. Mövzu ilə bağlı adıçəkilən şəxslər və aidiyyəti qurumlar açıqlama verəcəyi təqdirdə, həmin mövqeni dərc etməyə hazırıq.