Nizami rayonunda təhlükə siqnalı: 129 saylı məktəbin ətrafında küçə itləri şagirdlərə hücum edir
Nizami rayonu ərazisində yerləşən 129 saylı tam orta məktəb ətrafında yaranmış vəziyyət ciddi narahatlıq doğurur. Məktəbə gedib-gələn şagirdlərin və ərazi sakinlərinin həyatı real təhlükə altındadır. Valideynlərin bildirdiyinə görə, son günlər məktəb ərazisində və yaxın küçələrdə dolaşan küçə itləri azyaşlılara və insanlara hücum edir.
Şagirdlər səhər və axşam saatlarında məktəbə təkbaşına getməkdən qorxur, valideynlər isə övladlarını müşayiət etməyə məcbur qalır. Hadisələrin daha ağır nəticələrə səbəb ola biləcəyindən ehtiyat edən sakinlər aidiyyəti qurumların tam biganə qaldığını bildirirlər.
Qeyd olunur ki, məsələ ilə bağlı dəfələrlə şikayətlər edilsə də, indiyədək effektiv tədbir görülməyib. Bu isə uşaqların təhlükəsizliyinin açıq şəkildə risk altına atılması deməkdir. Məktəb ətrafı təhlükəsiz zona olmalı olduğu halda, hazırda qorxu məkanına çevrilib.
Valideynlər və sakinlər aidiyyəti qurumlardan dərhal müdaxilə, küçə itlərinin ərazidən uzaqlaşdırılması və şagirdlərin təhlükəsizliyinin təmin olunmasını tələb edirlər. Əks halda, baş verə biləcək hər hansı faciənin məsuliyyəti birbaşa məsul qurumların üzərində qalacaq.
Uşaqların həyatı laqeydlik qurbanı olmamalıdır.
