Şəhid Fəzail Qədimov adına 222 saylı məktəbdə “Son Zəng” tədbiri keçirildi

Qaradağ rayonunun Səngəçal qəsəbəsində yerləşən şəhid Fəzail Qədimov adına 222 nömrəli tam orta məktəbdə 2025-2026-cı tədris ilinin başa çatması münasibətilə “Son Zəng” tədbiri keçirilib.

Tədbirdə məktəb rəhbərliyi, müəllimlər, valideynlər və məzunlar iştirak ediblər. Əvvəlcə Azərbaycanın ərazi bütövlüyü uğrunda canlarından keçən şəhidlərin əziz xatirəsi ehtiramla yad olunub.
Məktəbin direktoru Aynurə Abdullayeva çıxış edərək məzunları təbrik edib, onlara gələcək həyatlarında uğurlar arzulayıb. Direktor qeyd edib ki, məktəb illəri hər bir insanın həyatında mühüm mərhələdir və bu illərdə qazanılan biliklər gələcək uğurların əsasını təşkil edir.
“Bu gün məktəbimiz daha bir məzun nəslini müstəqil həyata yola salır. İnanıram ki, məzunlarımız qazandıqları bilik və bacarıqlarla ölkəmizin inkişafına öz töhfələrini verəcək, hər zaman məktəbimizin adını uca tutacaqlar”, deyə Aynurə Abdullayeva bildirib.

Tədbir çərçivəsində şagirdlərin hazırladığı bədii kompozisiyalar, musiqi və rəqs nömrələri təqdim olunub. Məzunlar müəllimlərinə və valideynlərinə təşəkkürlərini ifadə edərək məktəb illəri ilə bağlı xatirələrini bölüşüblər.
Sonda “Son Zəng” səsləndirilib və məzunlar üçün yeni həyat mərhələsinin başlanğıcı elan olunub. Tədbir xatirə şəkillərinin çəkilməsi ilə başa çatıb.