Vətən müharibəsi qazisi: Qələbə Ordumuzun mənəvi haqqı, Zəfər isə xalqımızın taleyidir
Vətən müharibəsi qazisi: Qələbə Ordumuzun mənəvi haqqı, Zəfər isə xalqımızın taleyidir
Vətən müharibəsi qazisi: Qələbə Ordumuzun mənəvi haqqı, Zəfər isə xalqımızın taleyidirVətən müharibəsindən sonra nanəcib qonşularımızın dərs alacağına, bir daha təxribat və hücumlara yol verməyəcəyinə dair içimizdə az da olsa ümid yaranmışdı. Çünki 10-15 nəfərin qarşısından silahını atıb qaçan yüzlərlə hərbçisi, döyüşmək üçün zəncirlənən əsgəri olan ölkənin hücuma cəhd etməyəcəyinə inanmaq istəyirdik. Lakin görünən odur ki, revanşist qüvvələr kiminsə şirin yalanına ümidlənərək təxribatlar törətməyə davam etdilər. Hansısa qüvvələrin əlində oyuncaq olan Ermənistanın hərbi-siyasi rəhbərliyi növbəti rüsvayçılığın altına imza atdı. Ermənistan hakimiyyətinin Azərbaycanın sülh çağırışlarına məhəl qoymaması, Tovuz döyüşlərinin analogiyası olan təxribatlar törədərək yeni mövqelər əldə etmək niyyəti ölkəmizi öz təhlükəsizliyini təmin etmək üçün adekvat addımlar atmağa vadar etdi. Nəticədə itirən tərəf yenə də onlar oldular. Azərbaycan Ordusu düşmən üzərində növbəti qələbəsini qazandı. Həmçinin ordumuz bir neçə strateji yüksəkliyi nəzarətə götürdü, düşmənin xeyli sayda hərbi texnikası sıradan çıxarıldı, hərbi obyektləri, postları, canlı qüvvəsi məhv edildi.
2020-ci il Tovuz hadisələrindən hazırkı gərginliyi fərqləndirən önəmli cəhət odur ki, həmin dövrdə Azərbaycan əraziləri işğal altında idi. Bu gün isə Azərbaycan əsgəri dövlət sərhədimizin Kəlbəcər, Laçın, Zəngilan rayonları istiqamətində Ermənistanın təxribatlarına layiqli cavab verir. Düşmən bilməlidir ki, Azərbaycan Ordusu ərazi bütövlüyü uğrunda mübarizəni sonuna qədər aparacaq. Azərbaycan əsgəri düşmənin bütün təxribatlarına adekvat cavab vermək üçün hər an hazırdır. "Dəmir yumruq" hər zaman güclü, dağıdıcı və sarsıdıcı zərbə vurmaq iqtidarındadır. Qələbə Azərbaycan Ordusunun mənəvi haqqı, Zəfər isə Azərbaycan xalqının taleyidir. Təəssüf ki, növbəti Zəfərimiz də qəhrəman oğulların canı, qanı bahasına başa gəldi. Ərazi bütövlüyümüz, suverenliyimiz uğrunda ölümün gözünə dik baxan hərbi qulluqçularımızın ruhu qarşısında baş əyir, canlarını fəda etdiyi Vətən torpağının hər qarışının müdafiəsində ayıq-sayıq keşik çəkəcəyimizi söz veririk.
Bunu AZƏRTAC-a müsahibəsində "Xüsusi Təyinatlıların Qaziləri, Şəhid Ailələri və Veteranları" İctimai Birliyinin koordinatoru, Vətən müharibəsi qazisi, xüsusi təyinatlı qüvvələrin mənsubu Rəfail Nuruyev deyib.
Ömrünün 25 ilini Vətənin müdafiəsinə həsr edən R.Nuruyev onun iyirimi iki ilini xüsusi təyinatlı qüvvələrin mənsubu kimi keçirib. Bu illər ərzində müxtəlif hərbi əməliyyatlarda, o cümlədən Aprel döyüşləri və Vətən müharibəsi zamanı ən çətin tapşırıqların yerinə yetirilməsində iştirak edib. 44 günlük Şanlı Zəfər salnaməsinə adını yazdıranlardan biri olan R.Nuruyev Kəlbəcər, Cəbrayıl, Qubadlı, Zəngilan, Xocavənd və Şuşaya qədər şərəfli yol qət edib. Şuşada yaralansa da, buna heyfslənmir. Çünki Şuşanı görmək, onun quldurlardan təmizlənməsində iştirak etmək arzusuna çatıb. Cəsur döyüş yoldaşlarının itkisi onu kədərləndirsə də, "torpaqlarımız azaddır, onların da ruhu şaddır" deyib təskinlik tapır.
R.Nuruyev Vətən müharibəsində göstərdiyi şücaətlərə görə bir sıra medallarla - "İgidliyə görə", 3-cü dərəcəli "Hərbi xidmətdə fərqlənməyə görə", "Kəlbəcərin azad olunmasına görə", "Laçının azad olunmasına görə", "Cəbrayılın azad olunmasına görə", "Xocavəndin azad olunmasına görə" və "Şuşanın azad olunmasına görə" medalları ilə təltif olunub.
Ölkəmizdə şəhid ailələri və qazilərə göstərilən diqqət və qayğıdan söhbət açan R.Nuruyev həssas təbəqənin hər zaman qayğıkeş münasibətlə əhatə olunduğunu bildirib. Həssas təbəqədən olan vətəndaşların sosial rifahının yaxşılaşdırılması məqsədilə ölkə başçısının müxtəlif vaxtlarda Fərman və sərəncamlar imzaladığını, həmin qəbildən olanların problemlərinin həllinin ən əsas məsələlərdən biri olduğunu diqqətə çatdırıb. O da Vətən müharibəsi qazisi kimi işlə təmin olunduğunu, hazırda 3 saylı DOST mərkəzində çalışdığını qeyd edib.
"Vətənin dar günündə silaha sarılanlar və onların əmanətləri əmin əllərdədir", - deyə qazi fikirlərinə yekun vurub.
